Թեհրանի Հայոց Թեմի առաջնորդ Գերշ. Տ. Սեպուհ Ս. Արք. Սարգսեան Ժընեւում Շւեցարիա, մասնակցեց Իրանի Իսլամական Հանրապետութեան Մշակոյթի եւ Իսլամական Միջազգային Հաղորդակցութեան կենտրոնի միջ-կրօնական բաժանմունքի տնօրէնութեան եւ Եկեղեցիների Համաշխարհային Խորհրդի համատեղ կազմակերպութեամբ գումարւած համագումարին, որի թեման էր «Կրօն, խաղաղութիւն եւ բռնութիւն»:

Սոյն համագումարին մասնակցում էին Իրանից, Լիբանանից, Փաքիստանից, Անգլիայից, Գերմանիայից եւ Ամերիկայից իսլամագէտներ, համալսարանի դասախօսներ:

Յայտնենք, որ սոյն համագումարը հերթաբար տեղի է ունենում Թեհրանում եւ Ժընեւում Մշակոյթի եւ Իսլամական Միջազգային Հաղորդակցութեան կենտրոնի միջ-կրօնական երկխօսութեան տնօրինութեան եւ Եկեղեցիների Համաշխարհային Խորհրդի միջեւ:

Համագումարի մասնակիցներից իւրաքանչիւրը համագումարի թեմայի առնչած նիւթով ելոյթ ունեցաւ: Սեպուհ Սրբազան իր կարգին յատուկ դասախօսութեամբ ելոյթ ունեցաւ նիւթ ունենալով «Համագործակցութիւն կրօնական եւ քաղաքական ղեկավարութեան միջեւ ի խնդիր հաստատուն եւ մնայուն խաղաղութեան»: Իր ելոյթում Սեպուհ Սրբազանը կարեւորեց փոխադարձ վստահութեամբ երկխօսութեան եւ համատեղ գործակցութեան, որովհետեւ առանց վստահութեան կարելի չէ համագործակցութիւն: Իր դասախօսութեան մի այլ բաժնում Սրբազանը շեշտեց հրամայական պահանջքը իրական, վաւերական եւ անշահախնդիր երկխօսութեան: Առանց կրօնների միջեւ երկխօսութեան կարելի չէ հասնել բաղկացւած արդիւնքի, եզրակացուց Սեպուհ Սրբազանը:

Ընդհանուր զրոյցի շրջագծում Սեպուհ Սրբազանը դրականօրէն արտայայտւեց Իրանում ապրող կրօնական փոքրամասնութիւնների կրօնական ազատութիւնների մասին, դրւատելով յատկապէս Հոգեւոր Առաջնորդին առողջ եւ ողջմիտ կեցւածքի կրօնական փոքրամասնութիւնների նկատմամբ մի այլ տեղում էլ Սրբազանը բողոքեց Լիբանանում «Հըզբալլա» կուսակցութեան որպէս ծայրահեղական շարժում Ալղայիդայի շարքին դասելուն դէմ, յաւելելով որ «Հըզբալլա» այսօրերի Լիբանանեան քաղաքական կեանքում մեծապէս դրական եւ հաւասարակշռւած իր քաղաքականութեամբ կայունութեան գլխաւոր երաշխիքներից մէկն է:

Միւս դասախօսները իրենց կարգին կարեւորութեամբ շեշտեցին անհրաժեշտութիւնը փոխադարձ յարգանքի եւ սիրոյ, որոնցով կարելի կը լինի վայելել կրօնին (կրօնների) մարդկութեան պարգեւած երջանկութիւնն ու խաղաղութիւնը:

Ժողովականները երեքշաբթի երեկոյեան հիւրը եղան Եկեղեցիների Համաշխարհային Խորհրդի Գործադիր Վարչութեան, որի հետ ունեցան յատուկ նիստ, որից յետոյ տեղի ունեցաւ պաշտօնական ընթրիք ի պատիւ իսլամ-քրիստոնեայ համագումարի մասնակիցներին: