Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



Սրբազան Հօր Խօսքը Ընթրիք Երեկոյի Ընթացքին

Հանգամանաւոր սիրելի բարեկամներ, 

քոյրեր եւ եղբայրներ,

թանկագին հիւրեր

Քրիստոնէական ու եղբայրական սիրոյ եւ կարօտի ամենաջերմ զգացումներով ողջունում եմ ձեզ բոլորդ եւ իւրաքանչիւրդ առանձնաբար եւ ի սրտէ գոհութիւն եւ փառք եմ տալիս Ամենակալ Աստծուն՝ Տէրն ու Ստեղծիչը երկնքի եւ երկրի եւ ինչ որ կայ նրանց մէջ, որ մեզ այս գեղեցիկ ու խաղաղ գիշերը, մի անգամ եւս, պարգեւեց, միասնաբար վայելելու իր բարիքները նւիրական Րամազան ամսւայ այս 25-րդ օրւայ ընթացքին։

Խաղաղութիւնը Աստծուց մարդկութեան տրւած մեծագոյն պարգեւն է, առանց խաղաղութեան մարդկային կեանքը դժոխային վիճակի է մատնւում։ Կրօնական հասկացողութեամբ խաղաղութիւնը նոյնինքն կեանքն է։ Մեր Տէրը Քրիստոս աշխարհ եկաւ, որպէսզի մարդկութիւնը խաղաղութեամբ առ Աստւած առաջնորդէր։ Զաքարիա մարգարէն աւետելով Փրկչի գալուստը յաւելում է «Որ Նա խաղաղութիւն պիտի բերի մարդկանց եւ ազգերին, պիտի տիրի ջրերի վրայ՝ ծովից մինչեւ ծով եւ գետերից մինչեւ երկրի ծագերն»(Զք.9։10)։

Ի լրումն ժամանակի երկինքից հրեշտակները աւետեցին խաղաղութեան Իշխանի գալուստը.

«Փա՜ռք Աստծուն՝ բարձունքներում,

խաղաղութիւն երկրի վրայ

եւ հաճութի՜ւն մարդկանց միջեւ»(Ղկ. 2։14)։

Այ՛ո, Քրիստոս եկաւ եւ իր հետ սէր, հաճութիւն եւ խաղաղութիւն բերաւ. «Խաղաղութիւն եմ թողնում ձեզ, իմ խաղաղութիւնն եմ տալիս ձեզ, որ տարբեր է այս աշխարհի տւած խաղաղութիւնից»(Յհ. 14։27)։ Պօղոս առաքեալը կորնթացիներին գրած իր առաջին նամակում ասում է.-«Աստւած անկարգութիւն չի կամենում, այլ խաղաղութիւն»(Ա. Կր.14։33)։

Խաղաղութեան բացակայութեամբ մարդկային կեանքը կ՛աղարտի, կեանքի նպատակը կ՛անհետի եւ մարդկային ընկերութիւնը իր առաքելութիւնից եւ կոչումից հեռանում է։

Պատմութեան մի որոշ ժամանակում, պատմութեան թատերաբեմում ծնունդ առնելով իսլամութիւնը, իր կարգին, ինք էլ եղաւ խաղաղութեան շեփորահար ու խաղաղութիւն քարոզեց եւ մարդկութիւնը հրաւիրեց իրական աստւածապաշտութեան։ Միաստւածեան կրօնները չեն կարող տարբեր լինեն, քանի որ նրանց հիմնական նպատակը Աստծու կամքը իրագործելն է աշխարհում։

Դժբախտաբար սակայն միշտ չէ, որ մարդկութիւնը, միաստւածային կրօնների հետեւորդները հետեւում են կրօնի աստւածային ուսուցումներին եւ դրա համար էլ երկիրը, աշխարհը լցւել է ատելութեամբ եւ թշնամութեամբ։

Այսօրւայ աշխարհի ղեկավարութեան առաջնահերթութիւնները փոխւել են, նրանք փոխանակ հետամուտ լինեն իրական խաղաղութեան, ժողովուրդների միջեւ բարւօք յարաբերութիւնների հաստատման, անիրաււած ժողովուրդների իրաւունքների վերահաստատման ու սիրոյ տարածման, դժբախտաբար ճիշդ հակառակն են անում։

Գերպետութիւնները առաջնորդութեամբ Միացեալ Նահանգների եւ այլ կայսերապաշտ ուժերի խաղաղ ու ստեղծագործական կեանքով ապրող ժողովուրդների կեանքը դժոխքի վերածեցին ի խնդիր իրենց շահերի եւ սադայելական ծրագրների։ Դժբախտաբար Միջին Արեւելքը, որ եղել է միաստւածեան երեք կրօնների օրրանը, որով եւ սիրոյ ու խաղաղութեան աղբիւրը, այսօր այդ գերպետութիւնները փորձում են այն վերածելու բաբելոնեան խառնարանին։

Ահաբեկչական ու ծայրահեղական արարքներն ու շարժումները համատարած են եւ մեծ վտանգ են սպառնում ողջ մարդկութեան. ճշմարիտ Աստւածապաշտութեամբ ապրող հաւատացեալների համար լինեն դրանք քրիստոնեայ թէ իսլամ դատապարտելի են ե՛ւ ծայրահեղականութիւնը ե՛ւ ահաբեկչութիւնը, առաւել եւս մեծապէս դատապարտելի են խաղաղ բնակչութեան կեանքը հարցականի տակ դնող ծայրահեղական շարժումները, մանաւանդ խաղաղասէր ժողովուրդների ազգային-կրօնական, մշակութային այն արժէքները որոնք խորհրդանիշ են տւեալ ժողովրդի հոգեւոր կեանքի։ Ահա այս հասկացողութեամբ մենք դատապարտեցինք մօտաւորապէս երկու շաբաթ առաջ Թեհրանում կատարւած երկու ահաբեկչական արարքները, որոնց զոհ գնացին անմեղ քաղաքացիներ։ Առաւել եւս դատապարտել ու դատապարտում ենք ամէն ձեւի ծայրահեղականութիւն եւ ահաբեկչական արարք ընդդէմ խաղաղասէր ժողովուրդների։

Րամազանի սրբազան ծոմապահութեան այս հանգրւանին, ողջ իսլամական աշխարհը կոչւած է խաղաղութեամբ իր հացը բաժնելու իր կարիքաւոր եղբայրների եւ քոյրերի հետ եւ ոչ թէ հետամուտ լինելու անմեղների արեան հեղումին։

Մենք իբրեւ իրանցիներ բախտաւոր ենք եւ Աստծուն փառք ենք տալիս, որ ապրում ենք ապահով ու խաղաղ պայմաններում, որովհետեւ Իրանի Իսլամական Հանրապետութիւնը զօրեղ է ու զօրաւոր նախ իր ժողովրդի միասնականութեամբ ու միութեամբ եւ երկրորդ իր պաշտպանողական կարողականութեամբ։

Ծոմապահութիւնը, որ ըստ Էլ Ղազալի նշանաւոր փիլիսոփայի, հաւատացեալը մղում է հոգեպէս ու մտապէս զօրանալու, առիթ պէտք է լինի բոլորիս համախմբելու մեր երկրի ղեկավարութեան՝ հոգեւոր առաջնորդի, հանրապետութեան նախագահին եւ օրէնսդրական, դատական եւ ուժային կառոյցների շուրջ իբրեւ վկայութիւն մեր սիրոյն եւ կապւածութեան մեր հայրենիքի եւ ինչու չէ նաեւ խաղաղութեան եւ արդարութեան հաստատման։

Աստւած մարդկութիւնը ստեղծեց ասում է Քուրանը, որպէսզի մարդիկ միմեանց ճանաչեն եւ միատեղ ապրեն.«Ո՛վ մարդիկ, մենք ձեզ արու եւ էգ ենք ստեղծել, եւ ձեզ ցեղեր եւ տոհմեր ենք շինել, որ միմեանց հետ ծանօթութիւն անէք, ծանօթանաք, յիրաւի ձեզանից ամենից շատ պատւաւորը Աստծու առաջ ձեր ամենից երկիւղածն է, ահա Աստւած գիտացողն է եւ իրազեկ»(39։13)։

يا ايهاالناس إنا خلقناکم من ذکر وانثی وجعلناکم شعوبأ و قبائل لتتعارفوا. ان أکرمکم عندالله اتقاکم ان الله عليم خبير. «

Այսօր, ոչ միայն իսլամական աշխարհը, այլեւ ողջ մարդկութիւնը կոչւած է պատասխանատւութեան բարձրագոյն աստիճանի գիտակցութեամբ, փոխադարձ սիրոյ եւ յարգանքի մթնոլորտում միասին գործելու ի խնդիր մարդկային ընկերութեան պաշտպանութեան եւ խաղաղութեան ամրագրման։

Այս առիթով ուզում եմ կանխօրօք շնորհաւորել ձեզ սիրելիներ մօտալուտ Իտ Էլ Ֆիթրի առիթով եւ ձեզի մաղթել լաւագոյնին լաւագոյնը եւ կատարեալի կատարելագոյնը օծուն աստւածային օրհնութիւններով։ Աստւած խաղաղ ու ապահով, անվտանգ եւ միշտ ուժեղ պահէ մեր սիրելի Իրանն իր ողջ ժողովուրդով, պետական կառոյցներով եւ հոգեւոր առաջնորդով։

ՍԵՊՈՒՀ ԱՐՔ. ՍԱՐԳՍԵԱՆ

ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

 

ՏՕՆԵՐ

Կրօնական Տօների Օրացոյց


Երկուշաբթի 25 Մարտի 2024;
Աւագ երկուշաբթի

Երեքշաբթի 26 Մարտի 2024;
Աւագ երեքշաբթի

Չորեքշաբթի 27 Մարտի 2024;
Աւագ չորեքշաբթի

Հինգշաբթի 28 Մարտի 2024;
Աւագ հինգշաբթի

Ուրբաթ 29 Մարտի 2024;
Աւագ ուրբաթ

Շաբաթ 30 Մարտի 2024;
Ճրագալոյց

Կիրակի 31 Մարտի 2024;
Սուրբ Յարութիւն կամ Զատիկ

Կիրակի 07 Ապրիլի 2024;
Կրկնազատիկ եւ Աւետումն Սուրբ Կոյս Մարիամ Աստւածածնի

Կիրակի 14 Ապրիլի 2024;
Կանաչ կամ Աշխարհամատրան Կիրակի

Կիրակի 28 Ապրիլի 2024;
Սուրբ Խաչի Երեւման Տօն

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ