Զօրավար Հոսէյն Ռահիմին Թեհրանի իրաւապահ ուժերի հրամանատար է նշանակւել:

Երկուշաբթի՝ սեպտեմբերի 4-ին, աստւածային կրօնների ներկայացուցիչները այցելելով զօրավար Ռահիմիի գրասենեակը շնորհաւորեցին նոր պաշտօնում նրա նշանակումը:

Հանդիպմանը, որին ներկայ էր նաեւ իրաւապահ ուժերի հասարակական հարցերով տեղակալ գնդապետ Մոռադին, մասնակցում էին Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանը, Թեհրանի հայոց թեմական խորհրդի ատենապետ Ռոբերտ Բեգլարեանը, Իսլամական խորհրդարանում զրադաշտականների պատգամաւոր Էխթիարին, Հրեաների միութեան փոխնախագահ Քոհան Սեդղը եւ իսլամական մշակոյթի եւ առաջնորդութեան նախարարութեան հաւաքականութիւնների գերատեսչութեան կրօնական փոքրամասնութիւնների գրասենեակի պատասխանատու Սաիդ Թաղաւին:

Հանդիպման ժամանակ կրօնական փոքրամասնութիւնների ներկայացուցիչները շնորհաւորելով Թեհրանի իրաւապահ ուժերի նոր հրամանատարին, շնորհակալութիւն յայտնեցին յատկապէս կրօնական արարողութիւնների եւ տօնակատարութիւնների անվտանգութեան ապահովման հարցում իրաւապահ ուժերի արժէքաւոր ու շարունակական համագործակցութեան կապակցութեամբ եւ յոյս յայտնեցին այս համագործակցութիւնն ու համախոհութիւնը այսուհետ էլ կը շարունակւի:

Հանդիպման ժամանակ զօրավար Ռահիմին ընդգծեց, որ իրաւապահ ուժերն անցեալի նման հաւասար կերպով կարեւորում են իրանցի բոլոր քաղաքացիների անվտանգութեան ապահովումն ու նրանց ծառայութիւնը: