ՆՈՐ ՀՐԱՏԱՐԱԿՈՒԹԻՒՆՆԵՐ

Այսու ուրախութեամբ յայտնում ենք գրասէր եւ գրքասէր մեր ժողովրդի զաւակներին, որ վերջին երկու ամիսներին հովանաւորութեամբ թեմիս առաջնորդ Գերշ. Տ. Սեպուհ Ս. Արք. Սարգսեանի, Քրիստոնէական Դաստիարակութեան Բաժանմունքը հրատարակեց արժէքաւոր ու բովանդակալից հետեւեալ երեք գրքերը.-

Ա.- Յովհաննէս առաքեալի երեք ընդհանրական նամակները - բացատրական սերտողութիւն, հեղինակ՝ Մակար Ս. Եպս. Աշգարեան։

Գիրքը ձօնւած է Գերշ. Տ. Սեպուհ Ս. Արք. Սարգսեանի իր քահանայական ձեռնադրութեան եւ օծման 50-ամեակի եւ Թեհրանի Հայոց Թեմի առաջնորդութեան 19-ամեակին։ Հոգեւոր բովանդակութեամբ մեկնաբանական սերտողութիւն է Յովհաննէս առաքեալի ընդհանրական երեք նամակների։ Գրքի մեկենասն է Տկն. Նինա Աւետեանը։

Բ.- Հայոց տաժանքի ճամբաներով - երկու հատոր – հեղինակ՝ Յովհաննէս Աւ. Քհնյ. Հաճեան։

Հեղինակը հայ ժողովրդի տառապալից կեանքն իր դառնութիւններով ու քաղցրութիւններով ներկայացրել է շատ պարզ ու քաղցրաբոյր ոճով. վերջին աւելի քան հարիւր տարիների մեր ժողովուրդի ազատագրական պայքարին ոչ միայն մասնակից է եղել այլեւ եղել է առաջատար քաջամարտիկ, որ մէկ ձեռքում խաչ եւ միւսում զէնք պայքարել է Կարսում, Ապարանում, Սարդարապատում, այնուհետ Փետրւարեան ապստամբութեան ժամանակ եւ ի վերջոյ հանգրւանել է Իրան – Թեհրան։

Գիրքը վերահրատարակւել է Հայաստանի Ա. Հանրապետութեան անկախութեան եւ պետականութեան հաստատման 100-ամեակի առիթով։

ա. հատորի մեկենասը եղել է Տիար Հարմիկ Մահմուդեանն ի յիշատակ իր վաղամեռիկ կնոջ եւ ծնողներին։

բ. հատորի մեկենասը եղել է Գերշ. Տ. Սեպուհ Ս. Արք. Սարգսեանն իր քահանայական ձեռնադրութեան եւ օծման 50-ամեակի առիթով եւ նւիրւած Լիսբոնի հինգ յաւերժայիշատակ նահատակներին։