43-րդ շրջանի Համադպրոցական խաղերի բացումը՝ «Արարատ» մարզաւանում

Հինգշաբթի, Յունւարի 10-ի երեկոյեան, տեղի ունեցաւ 43-րդ շրջանի Համադպրոցական խաղերի բացումը, Հ. Մ. «Արարատ» Կազմակերպութեան Մարզական միութեան նախաձեռնութեամբ:

13 դպրոցների եւ 4 մանկապարտէզների աշակերտ-աշակերտուհիների մասնակցութեամբ խաղերի բացումը զուգորդւած էր գեղարւեստական, մարզական ճոխ կատարումներով եւ խօսքերով:

Նախքան հանդիսութեան պաշտօնական բացումը, ներկաները ունկնդրեցին «Ալէն» նւագախմբի կատարումները, որը մէկտեղւած էր խաղերի անցեալը պատկերող սահիկների ներկայացմամբ: Տէրունական աղօթքով մեկնարկած հանդիսութեանը Մարզական միութեան վարչութեան խօսքը փոխանցեց փոխնախագահ Հարմիկ Սարգսեանը, իսկ Հ.Մ.Ա.Կ.-ի Կենտրոնական վարչութեան խօսքը փոխնախագահ Ժանետ Թարվերդեանը:

Երբ սկաուտների միջոցով մարզադահլիճում տեղակայւեցին կազմակերպութեան եւ խաղերը խորհրդանշող դրօշակները, ժողովուրդը յոտնկայս ունկնդրեց կազմակերպութեան հիմնը, որից յետոյ ներկաների խանդավառ ծափողջոյններով կատարւեց աշակերտների տողանցքը, որին յաջորդեց երդման արարողութիւնը: Մարզիկների երդումը ընթերցեց Դայանա Յակոբեանը, իսկ իրաւարարներինը՝ Գեղարդ Թահմասեանը: Բոլոր ներկաների բուռն ծափողջոյնների ներքոյ Իրանի ժայռամագլցման ազգային հաւաքականի անդամ եւ Ասիայի առաջնութեան մէջ իր ուրոյն տեղը գրաւած Շանթ Իսաղուլեանը եւ թենիսի մարզաձեւում Իրանում անգամներ առաջնութիւն շահած Մինէ Մարտիրոսեանը մարզադահլիճ բերեցին խաղերը խորհրդանշող ջահը, որը Թ. Հ. Թ. առաջնորդ Տ. Սեպուհ արք. Սարգսեանի ձեռամբ օրհնւելուց յետոյ, բոցավառւեց հրավառութեան ներքոյ:

Հանդիսութեանը ներկաներին խօսք ուղղեց Սրբազան Հայրը, որ շնորհաւորելով Ամանորը եւ Ս. Ծնունդն ու Աստւածայայտնութիւնը, աշակերտութեանը մաղթեց մտքի պայծառութիւն:

Գեղարւեստական բաժնում ասմունքային կատարումով ելոյթ ունեցան Նոյ Նազարեանը եւ Քաջունի Տէր-Առաքելեանը, քնարի կատարումով ելոյթ ունեցաւ Մերեդիթ Մովսիսեանը: Ցուցադրական հեծանւավազքը իրականացրեց Նարեկ Ալլահեարեանը, իսկ պարային առանձին կատարում-ներով ելոյթ ունեցան Հ.Մ.Ա.Կ.-ի «Արարատ», նաեւ «Ակունք», «Զարթօնք», «Սիփան», «Կակաչ», «Նայիրի» եւ «Նռանի» պարախմբերը, որոնք հանդիսութեան աւարտին միասնաբար ներկայացրին Քոչարին:

Աշակերտական «Նարեկ» երգչախմբի կարատմամբ հնչեցին երգեր:

Օրւայ հաղորդավարն էր՝ Սէրլի Ղեւոնդեանը: Յատկանշական է, որ խաղերը կը կայանան շաբաթական պարբերականութեամբ՝ հինգշաբթի եւ ուրբաթ օրերին:

Լուրը՝ «Ալիք»-ից