Իրանահայ երիտասարդ՝ Նորվան Դիլիան Բեհբուն ոսկեայ մեդալ է շահել Սէուլի համաշխարհային գիտական մրցոյթում

Ուրախութեամբ տեղեկացել ենք, որ իրանահայ երիտասարդ Նորվան Դիլիան Բեհբուն, ոսկեայ մեդալ է շահել Սէուլում անցկացւած աշխարհի գիւտարարութեան եւ ստեղծագործական համաշխարհային 8-րդ օլամպիադայում:

Թւականիս յուլիսի 25-ից 27-ը հարաւային Կորէայի Սէուլում կայացաւ աշխարհի գիւտարարութեան եւ ստեղծագործական 8-րդ օլամպիադան, որին մասնակցել էր Իրանից երիտասարդ գիւտարարների խումբը, անդամակցութեամբ իրանահայ Նորվան Դիլիան Բեհբուի: Յատկանշական է, որ Իրանի հաւաքականի երիտասարդները մրցակցելով աշխարհի 22 երկրների հաւաքականների հետ, շահել են 8 ոսկեայ մեդալներ եւ երկու մասնաւոր պարգեւներ:

Նորվանը ոսկեայ մեդալը եւ պատւոգիրը շահել է մեխանիկի եւ մեգաթրոնիկի ոլորտում իր պատրաստած ռոբոտի շնորհիւ, որը կարող է շարժւել ցամաքում եւ ջրում:

Նորվանը ծնւել է 2005 թւականի օգոստոսի 11-ին Թեհրանում, տարրական ուսումը ստանալով «Ռոստոմ» տղայոց դպրոցում, իսկ միջնակարգը աւարտել է ոչ-հայկական «Թաֆաքոր սեֆիդ» դպրոցում: Նրան միշտ էլ հետաքրքրել է իր մեծ հօր աշխատանքը՝ տեխնիկական ճարտարագիտութեան ոլորտում եւ ինքն եւս հակւել է դէպի մեգաթրոնիկ: Նա իր նախագծած ռոբոտների շնորհիւ բազմիցս է մասնակցել միջազգային մրցութիւնների, ինչպէս 2018-ին Կուալալամպուր, 2019-ի ապրիլին Շանհայ, շահելով արծաթէ մեդալ եւ Սէուլի վերջին մրցոյթը, որտեղ նա շահել է ոսկեայ մեդալ, պարծանք հանդիսանալով Իրանի եւ հայ համայնքի համար:

Իրանական պատւիրակութեան մասնակցութեան մասին Իրանում, աշխարհի գիւտարարութեան հոգեմտաւոր կազմակերպութեան ներկայացուցիչ Մեհրան Խոսրովանիի հաւաստմամբ, իրանցի ուսանողները Սէուլ են մեկնել «Սինա» աշակերտական նախագծերի միջազգային փառատօնի հովանաւորութեամբ:

Իրանի հաւաքականի կազմը մասնակցել է հետեւեալ բնագաւառների մրցութիւններին, ինչպէս՝ քիմիա եւ սարքաւորումներ, էլեկտրոնիկ եւ էլեկտրաէներգիա, մեխանիկ եւ մեգաթրոնիկ, մետալոգիա, եւ բժշկական սարքաւորումների ճարտարագիտութիւն:

Լուրը «Ալիք»-ից