«Ա.Աւետիսեան» Ազգ. Բուժարանի Խնամակալ մարմինը, ուրբաթ թւականիս ապրիլի 17-ին, հանդիպել է բուժարանում շուրջօրեայ աշխատող եօթ ընդհանուր բժիշկներից վեցին՝ բուժարանի փոխտնօրէնի եւ հաշւապահական բաժնի պատասխանատուի ներկայութեամբ։

Հանդիպման ընթացքում երկկողմ քննարկւեց բուժարանի՝ թէ աշխատանքային եւ թէ նիւթական ներկայ իրավիճակը։ Համաճարակի կանխարգելման եւ թելադրւած սոցիալական տարածութիւնը պահպանելու նպատակով, արձագանքւեցին առաջարկութիւններ բուժարանի տարածքը աւելի յարմարաւէտ դարձնելու կապակցութեամբ։ Քննարկւեց բժիշկների պայմանագրերում ապահովագրութեան կապակցութեամբ առկայ որոշ խնդիրները։ Բուժարանում սպասարկումները ընդլայնելու նպատակով, քննարկւեց բուժարանի դեղատան աշխատանքի ժամերը ըստ օրէնքի աւելացնելու հնարաւորութեան նաեւ արձակ օրերին բժիշկների անհրաժեշտ ներկայութեան եւ վճարման ձեւաչափի առնչութեամբ։

Հարկ է նշել, որ վերջին 45 օրերի ընթացքում, երկրում կորոնավիրուս համաճարակի պատճառով գոյացած առողջապահական ճգնաժամային իրավիճակի բերումով, բուժարանի ընդհանուր բժիշկները ակտիւօրէն եւ ամենօրեայ երեք հերթափոխով, շուրջօրեայ ներկայութիւն են ունեցել եւ ընդունել եւ սպասարկել են բոլոր դիմորդներին։

Առ այդ Խնամակալ մարմինը առիթը օգտագործելով, բարձր գնահատեց ընդհանուր բժիշկների ցուցաբերած անվերապահ համագործակցութիւնը եւ վտանգի առաջին ճակատում իրենց ներկայութիւնը։

Խնամակալ մարմինը արձագանքւած առաջարկութիւնները լսելով, խոստացաւ, որ ամենայն բծախնդրութեամբ վերահասու է լինելու բոլոր հարցերին նաեւ յայտնեց, որ յետայսու բուժարանի իրավիճակը բարելաւելու նպատակին հասնելու հեռանկարով, յաճախակի հանդիպումներ է կազմակերպելու բուժարանի ընդհանուր եւ մասնագէտ բժիշկների հետ իսկ վերջում բժիշկներին կոչ արեց, որպէսզի ներկայ տիրող առողջապահական ճգնաժամային կարգավիճակում, Մարմնին աջակցել աշխատանքները սահուն ընթանալու կապակցութեամբ։

«Ա.ԱՒԵՏԻՍԵԱՆ» ԱԶԳ. ԲՈՒԺԱՐԱՆԻ
ԽՆԱՄԱԿԱԼ ՄԱՐՄԻՆ
23.04.2020