ԸՆԹԵՐՑՈՒՄՆԵՐ

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ



ԱՆԼԱՅՆ ՎՃԱՐՈՒՄ

Ծխական Տուրք

Մեր փոքր , բայց կարեւոր ներդրում է Ազգային-Համայնքային կառոյցների Պահպանման համար

Սիրելի ժողովուրդ, Թեհրանի հայոց Թեմական Խորհրդի որոշմամբ՝ Ծխական Տուրքի վճարումը Ձեզ համար դիւրացնելու նպատակով՝ այսուհետ կարող էք կատարել այս կայքի միջոցով, որով օգտակար կը հանդիսանաք թեմիս ազգային-համայնքային կառոյցների պահպանման գործին:

ԾԽԱԿԱՆ ՏՈՒՐՔԻ ԱՆԼԱՅՆ ՎՃԱՐՈՒՄ

ՎԵՐԱՆՈՐՈԳ ՀԱՒԱՏՔՈՎ ԶՕՐԱՆԱՆՔ

Այս օրերին աշխարհը տիրապետւած պսակաձեւ ժահրով, մարդկութիւնը պատմութեան մեծագոյն մարտահրաւէրներից մէկի առաջ է դրել։ Անցեալ տարւայ ընթացքին պսակաձեւ ժահրը իր աւերը գործեց ու դեռեւս շարունակում է անխնայ հարւածել իր շրջապատը հարիւր հազարաւոր անմեղ մարդկանց մահւան պատճառ դառնալով։

Այս անողոք ու մահաբեր համաճարակի ճնշիչ մթնոլորտին մէջ տւայտող մեր ժողովուրդը ինքն իրեն գտաւ 27 սեպտեմբեր 2020 ծայր առած մի այլ մահաբեր ու կործանարար ժահրի դիմաց, արտայայտւած Արցախ-Ազերիա թրքական եւ միջազգային ահաբեկչական խմբակցութեան անդամների համատեղ պատերազմով, որ տարածւած 44 օրերի վրայ ամէն կողմ աւեր ու աւար տարածեց միաժամանակ հազարաւոր հայորդիների նահատակութեան պատճառ դառնալով։

Բարեբախտաբար որպէս քրիստոնեայ ժողովուրդ այս չարաղէտ պատուհասները առիթ են մեզ համար, վկայելու մեր հաւատքն ու յոյսը խարսխւած Յիսուս Քրիստոս Վէմին վրայ։ Սա գեղեցիկ առիթ է միանգամայն, որ Քրիստոսի ծնունդով մեզ շնորհւած Փրկութեան խորհուրդն ու անկէ ճառագայթող հաւատքն ու յոյսը բաժնեկցենք միմեանց հետ եւ դրանցով զօրացած ու ամրացած փորձենք յաղթահարել այս աղէտները։

Մարդկային կեանքը լի է գայթակղութիւններով, փորձութիւններով. երանելի են նրանք, ովքեր հոգեւոր ու բարոյական արժէքներով սպառազինւած հաւատքով պայքարում են ամէն տեսակ փորձութիւնների եւ գայթակղութիւնների դէմ։

Հայակեանքը եւս, անցեալ աւելի քան երեք հազար տարիների ընթացքին, քալեց մահւան ձորի միջով եւ սակայն չյուսահատւեց. ապրեց դառնութիւնը պարտութիւնների, սակայն չթուլացաւ իր առաքելութեան մէջ. մութ ու խաւար կածաններից անցաւ առանց յուսահատութեան ու շնորհիւ իր լուսաւոր հաւատքի, աննկուն կամքին կարողացաւ խաւարը լոյսի փոխակերպել ու շարունակել իր կեանքը։

Նոր տարւայ եւ Ծննդեան տօների սեմին կանգնած, ազգովին սուգի մէջ ենք. մեր պատմական հողերի կորուստը, անտուն մնացած հազարաւոր հայորդիների տխուր հայեացքները, հազարաւոր նահատակների արեան կանչը եւ նոյնքան վիրաւորների թախծոտ նայւածքը մեզ լալու չափ յուզում են, առանց սակայն յուսահատութեան, յուսախաբութեան մատնելու։ Ճիշդ է տխուր ենք ու սրտաբեկ եւ սակայն տօների խորհուրդը պէտք է մեզ սթափեցնի, նորի ու նորոգութեան, նոր կեանքի եւ խոստացւած փրկութեան հեռանկարը մեզ առաւել եւս ամրապնդելու եւ յաղթականօրէն մեր առաքելութիւնը շարունակելու պատգամ են փոխանցում մեզ։ Չմոռանանք, որ տառապանքն ու դառնութիւնները կեանքին մարդը զօրացնում ու մղում են ստեղծագործ կեանքի։ Կ. Պոլսոյ պատրիարք Նարոյեան Սրբազանը գրում է.-«Վիշտն է, որ սովորեցրել է մարդկանց քաղաքակրթութեան բարիքներն ու արւեստը, բարձր բանաստեղծութիւնն ու անձնազոհ բարոյականը։ Կրօնական եւ հասարակական գործերում ներշնչել է հերոսութիւններ եւ դրել է անհունը սիրոյ մէջ։ Վիշտն է մարդկանց մեծագոյն դաստիարակը եւ կատարելութեան ամենաազդու գործիքը»։

Այս օրերի մեր տառապանքն ու վիշտը, սուգն ու ցաւը հրեղէն բոցեր են մեր կեանքում այրելու, հրկիզելու չարն ու թշնամութիւնը, ատելութիւնն ու չարաբանութիւնը, անհանդուրժողութիւնն ու այլամերժութիւնը, սուտն ու կեղծիքը եւ նրանց տեղ մեր սրտերում սերմանելու սէր եւ խաղաղութիւն, եղբայրութիւն եւ այլասիրութիւն, անշահախնդիր հայրենասիրութիւն եւ հաւատարմութիւն, այլ խօսքով նոր եւ աստւածահաճ կեանք, որի ընթացքը կարող է հեզասահ ու առանց դժւարութիւնների չլինի. սակայն դժւարութիւններն, նեղութիւններն ու պարտութիւնները ժամանակաւոր են ու վաղանցուկ։ Քրիստոս ասում է.«Եթէ մանանեխի հատիկի չափ հաւատ ունենաք եւ ասէք այս թթենուն ՛՛Արմատախիլ եղիր եւ տնկւիր ծովի մէջ՛՛, նա կը հնազանդւի ձեզ»(Ղկ. 17։6)։

Հաւատացեալ մարդու համար անկարելի բան չկայ։ Հաւատքով ու սիրով մաքրենք մենք զմեզ եւ վստահ եղէք, որ պիտի կարողանանք կերտել փայլուն ապագայ։ Բեթղեհէմի երկնակամարը լուսաւորող Աստղի լոյսով պայծառափայլ գործենք ի խնդիր աւելի խաղաղ ու պայծառ կեանքի։

Այո՛, դառն է պարտութիւնը, աւելի դառն է հայրենիք կորսնցնելը. եօթանասուն հինգ տարւայ իմ կեանքում ոչ մի վայրկեան հայրենիքի, Հայաստանի տեսիլքը մտահան չեմ արել, որովհետեւ հայրենասիրութիւնը մանկութեան օրից օրօրօցային մեղմ ու քնքուշ երգ իբրեւ, միախառնւեց իմ էութեան եւ այնուհետ դարձաւ իմ ուղեկիցն ու ճանապարհորդակիցը։
Յաճախ ունեցած ենք պարտութիւններ մեր յաղթանակների կողքին։ Քանի՜ քանի՜ անգամներ աւերի ու աւարի են ենթարկւել մեր շէն քաղաքները, գիւղերը, աւանները, վանքերն ու տաճարները եւ սակայն երբեք չենք ընկճւել ու յուսահատւել, յարատեւօրէն մեր ականջներին է հասել Քրիստոսի կեանք բուրող խօսքը «Մի՛ վախեցիր, բայց միայն հաւատա»։

Կոչ եմ անում մեր ժողովրդի հաւատաւոր զաւակներին, որ հնարաւորութեան սահմաններում, ժուժկալ լինեն իրենց տօնական օրերին յատուկ սեղանների կազմակերպման մէջ. ամանորեայ խրախճանք ընթրիքներից հեռու մնան եւ աւելի ժամանակ տրամադրեն աղօթքի, խոկումի եւ Աստծու խօսքի ընթերցման։

Աւանդաբար տօնական օրերին տեղի ունեցող նւէրների միմեանց փոխանակումը փոխարինէք Արցախի մեր որբացած, այրիացած, անդամալուծւած ժողովրդի զաւակներին հասցէագրութեամբ։

Լինենք զգաստ ու զգօն եւ Քրիստոսի սիրոյ եւ հաճութեան զգացումներով միմեանց շնորհաւորենք եւ աղօթենք մեր հազարաւոր նահատակների հոգիների խաղաղութեան համար, նրանց ծնողների մխիթարութեան եւ աշխարհի խաղաղութեան համար։

Յիշեցէ՛ք, Քրիստոսի ծննդեան առիթով, արեւելքից երեք մոգեր եկան Բեթղեհէմ եւ նորածին Մանուկ Յիսուսին ընծայեցին իրենց նւէրները՝ ոսկի, կնդրուկ եւ զմուռս։ Մոգերի նման մենք էլ մեր ընծաները մատուցենք մեր մանուկներին, հայրենազուրկ մեր ժողովրդին։

Ահա այս խոհերով ու սրտաբուխ կոչով շնորհաւորում եմ ձեզ սիրելիներ։ Աղօթում եմ, որ ծնեալ Փրկիչը իր ծնունդով աշխարհ բերի, մի անգամ եւս, սէր, խաղաղութիւն, եղբայրութիւն, միութիւն ու միասնականութիւն եւ մեզանից հեռացնի ատելութիւնն ու թշնամանքը, անհանդուրժողութիւնն ու նենգութիւնը եւ սիրոյ ու խաղաղութեան սերմերով մեր սրտերը վերածի կանաչ արօտավայրի, որտեղ տիրի խաղաղ ու համերաշխ կեանք։

Աղօթում եմ ձեզ համար սիրելիներ, մեր եկեղեցու պայծառութեան եւ հայրենիքի ու Արցախի խաղաղութեան համար։ Աշխարհը այսօր որեւէ մի ժամանակից աւելի կարիքը ունի խաղաղութեան։ Միասնաբար աղօթենք միմեանց համար, աշխարհի եւ յատկապէս Իրանի Իսլամական Հանրապետութեան եւ իր հոգեւոր եւ աշխարհական ղեկավարութեան եւ ժողովրդի համար։

«Փա՜ռք Աստծուն՝ բարձունքներում,
Խաղաղութի՜ւն երկրի վրայ
Եւ հաճութիւն մարդկանց միջեւ»

Շնորհաւոր նոր տարի եւ Ս. Ծնունդ
Քրիստոս ծնաւ եւ յայտնեցաւ
Ձեզ եւ մեզ մեծ Աւետիս. Ամէն։


ԱՂՕԹԱՐԱՐ
ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

ԼԵԶՒԻ ԸՆՏՐՈՒԹԻՒՆ

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com