ՍՐԲԱԶԱՆ ՀՕՐ ՄԱՍՆԱԿՑՈՒԹԻՒՆԸ Հ.Մ. «ԱՐԱՐԱՏ» ԿԱԶՄԱԿԵՐՊՈՒԹԵԱՆ 29-ՐԴ ՊԱՏԳԱՄԱՒՈՐԱԿԱՆ ԺՈՂՈՎԻ ԲԱՑՄԱՆ ԱՐԱՐՈՂՈՒԹԵԱՆ

Երէկ՝ երեկոյեան թւականիս յունիսի 16-ին, Հ.Մ. «Արարատ» Կազմակերպութեան մարզաւանի բացօթեայ տարածքում, Կազմակերպութեան հիմնով կատարւեց 29-րդ Պատգամաւորական ժողովի պաշտօնական բացումը, որին իր մասնակցութիւնը բերեց Թեմիս Բարեխնամ Առաջնորդ՝ Գերշ․ Տ․ Սեպուհ Ս․ Արք Սարգսեանը, ընկերակցութեամբ Թ.Հ.Թ. Թեմական խորհրդի անդամներ՝ պրն. Վահէ Թարոյեանի եւ տկն. Լինդա Ղահրամանեանի։

Միջոցառմանը ներկայ էին, ԻԻԽ Թեհրանի եւ Հիւսիսային իրանահայութեան պատգամաւոր՝ պրն. Արա Շահվերդեանը, «Ալիք» Հաստատութեան, քոյր միութիւնների եւ Կազմակերպութեան միութիւների ներայացուցիչները ու Կազմակերպութեան Կենտրոնական վարչութեան անդամները:

Հանդիսութիւնը բացւած համարւեց Կազմակերպութեան նախագահ՝ պրն. Հարմիկ Զովէլեանի բարեգալստեան խօսքով, որից յետոյ յիշեալը հակիրճ զեկոյց ներկայացրեց վարչութեան երկամեայ գործունէութիւնից: Ապա սփռւեց «Համազգային»-ի Կենտրոնական վարչութեան նախագահ Մկրտիչ Մկրտչեանի պատկերային պատգամը: Իրենց հերթին եւս ելոյթ ունեցան պատգամաւոր՝ պրն. Արա Շահվերդեանն ու «Ալիք» Հաստատութեան ներկայացուցիչ՝ պրն. Դերենիկ Մելիքեանը:

Եզրափակիչ բաժնում Սրբազան Հայրը հանդէս գալով, հաստատեց այն իրողութիւնը, որ մարդկային կեանքի ամենից դժւար եւ փորձիչ ժամանակահատւածը այն է, երբ մարդ ստիպւած է դժւարութիւնների, տագնապների դէմ հանդիպման գտնւած, իր կեանքը առաջ տանել։ Նա յաւելեց, որ նեղութիւնների եւ տագնապների միջից անցնելով է, որ կերտւում է մարդու նկարագիրը։ Նա իր խօդքը շարունակելով ասաց, մենք անցնող վերջին տարիներին թէ եւ անցանք տագնապալից պահեր, բայց ոչ մի ժամանակ չտրւեցինք յուսահատութեան եւ յուսախաբութեան, այլ այդ բոլորը խթան հանդիսացան առաւել ջանքով առաջ տանել մեր աշխատանքները։ Ապա գնահատելով Հ.Մ. «Արարատ» Կազմակերպութեան կենտրոնական վարչութեանը, ասաց՝ հեճուկս վերջին տարւայ դժւարութիւններին, վերջինս արեց գերագոյնը, որ այս Նոյան Տապանին նմանւող հսկայ կառոյցը կարողանայ ալեկոծ ծովու վրայ առաջ գնալ, դէպի խաղաղ նաւահանգիստ։ Սրբազան հայրը նաեւ գնահատելով մեր համայնքի միւս միութիւններն ու եկեղեցիների աշխատանքը, որոնք նոյն վիճակին մատնւած լինելով հանդերձ, հաւատքով եւ նոյն ուժգնութեամբ իրենց աշխատանքով մեր ժողովրդի անւան մեծ պատիւ արձանագրեցին։
Ի վերջոյ Սրբազան հայրը իր խոր եւ անկեղծագոյն գնահատանքը յայտնեց Հ.Մ. «Արարատ» Կազմակերպութեան եւ կենտրոնական վարչութեան եւ բոլոր միութիւններին, դժւարին պայմաններում անկարելին կարելիին վերածելու ու անսայթաքօրէն այս կազմակերպութեան անիւը առաջ տանելու համար։

Սրբազան հայրը անդրադառնալով հայրենիքում կատաւող անսպասելի դէպքերն, ասաց՝ թէ եւ մենք փայփայում էինք այնպիսի ծրագրեր մեր նոր սերնդին ազգային ոգի եւ դաստիարակութիւն ներարկելու եւ ինչու չէ նաեւ հոգեւոր արժէքների իմացում, բայց այսօր մեզ անիրականելի է թւում։ Սրբազան հայրը իր խօսքում քստմնելի եւ դատապարտելի համարեց Էրդուղանի եւ Ալիեւի այցը Հայկական Շուշի եւ կեղծ ու անվաւեր յայտարարութիւններ համարեց ստորագրաւած պայմանագրերը։ Նա յոյս ներշնչելով ներկաներին յաւելեց, որ պիտի գայ այն օրը, որ հայ ժողովրդը միաւորւած պիտի տիրանայ իր Շուշիին, գօտեպնդւած իր հաւատքով եւ գորժելու պատրաստակամութեամբ։ Վերջում Սրբազան Հայրը իր օրհնութեան խօսքը փոխանցելով կազմակերպութեանը, յոյս յայտնեց Աստծոյ առաջնորդութեամբ Պատգամաւորական ժողովի ընթացքում պատւաբեր որոշմամբ եւ ծրագրերով նորանոր յաջողոիթիւններ արձանագրի ի պատիւ հայ ժողովրդի։ Հանդիսութիւնը աւարտւեց համեստ հիւրասիրութեամբ եւ մտերմիկ մթնոլորտում:

Հարկ է նշել միջոցառումը ուղղիղ եթերով հեռարձակւում էր Կազմակերպութեան ինստագրամային էջով:

Ազգային Առաջնորդարանի Հանրային կապ

 Լուսանկարիչ՝ Ադիս Իսաղուլեան