ՀԱՆԴԻՊՈՒՄ ՄԱՐՄՆԱՄՏԱՅԻՆ ԽԱՆԳԱՐՈՒՄՆԵՐՈՎ ԵՐԵԽԱՆԵՐԻՆ ՕԺԱՆԴԱԿՈՂ «ԱԿՈՒՆՔ» ԿԵՆՏՐՈՆԻ ՏՆՕՐԷՆՈՒԹԵԱՆ ՀԵՏ

Կիրակի թւականիս մարտի 12-ին, Թեմական խորհրդի ատենապետ ճրտպ. Նորայր Արամեանը ընկերակցութեամբ Խորհրդի ատենադպիր եւ «Ակունք» կենտրոնի հետ կապ՝ Լինդա Ղարախանեանի, հանդիպում ունեցան Կենտրոնի տնօրէնութեան՝ տկն. Վանուշ Թեւանեանի եւ տկն. Լուսինէ Յովհաննիսեանի հետ:

Հանդիպման ընթացքին զեկոյց ներկայացւեց Կենտրոնի ընդհանուր աշխատանքների, նախատեսւած ծրագրերի ինչպէս նաեւ առկայ մտահոգութիւնների վերաբերեալ, որոնք նիւթական դժւարութիւններից զատ հիմնականում կապւած են կենտրոնի որոշ սաների եւ ընտանիքների բարձր տարիքին եւ դրա հետեւանքով առաջացող դժւարութիւններին:

Տկն. Թեւանեանը նաեւ նշեց, որ Սրբազան Հօր հովանաւորութեամբ թւականիս մայիսի 11-ին, «Նայիրի» միութեան «Արցախ» սրահում կայանալու է կենտրոնի սաների նկարչական աշխատանքների ցուցահանդէսը:

Պրն. Արամեանը գոհունակութեամբ անդրադարձաւ Կենտրոնի աշխատակազմի մարդասիրական եւ դժւարին աշխատանքին եւ յաւելեց, որ Թեմական խորհուրդն իր հնարաւորութեան սահմաններում նեցուկ է հանդիսանալու Կենտրոնի աշխատանքներին:

Ազգային Առաջնորդարանի Հանրային Կապ