Աբրահամեան կրօնների բնօրրան՝ Պաղեստինեան հողի օկուպացիայի սկզբից ի վեր, թշնամական Սիոնիստական ռեժիմը խախտելով միջազգային կոնվենցիաներն ու օրէնքները, պաղեստինեան ազգի նկատմամբ զանգւածային սպանութիւններ ու պաշարումներ է իրագործել։
Օսմանեան կայսրութեան հիմնադրումից եւ այդ կայսրութեան սիոնիստ գործակալների ներթափանցումից ի վեր հայ ազգը ենթարկւել է ջարդերի ու անմարդկային սպանութիւնների ու էթնիկ զտումների։ 1915-1923 թթ. Հայոց Ցեղասպանութիւնը այս իրողութեան ապացոյցն է։ Այսօր մենք ականատես ենք լինում պատմութեան կրկնութեան. Բաքւի վարչակարգը Իսրայէլի զաւթիչ կառավարութեան ուղարկած ռազմական օբիեկտներով ու աջակցութեամբ էթնիկ զտման ենթարկեց Արցախում առաւել քան չորս հազար տարի ապրող հայ ժողովրդին եւ վտարեց իրենց պապենական հայրենիքից։
Մենք՝ Իրանի հայ համայնքը, մեզ աշխարհի ճնշւած ժողովուրդների՝ յատկապէս պաղեստինեան ժողովրդի ցաւակից եւ համախոհն համարելով, դատապարտում ենք վերջին օրերին Գազայի հատւածի վրայ Իսրայէլի դաժան յարձակումները եւ յատկապէս «Ալ-մոամմեդանի» հիւանդանոցի ռմբակոծմանը, որտեղ զոհւեցին մեծ թւով երեխաներ եւ կանայք, ինչպէս նաեւ բուժաշխատողներ։ Նաեւ աշխարհի ազատատենչ ժողովուրդներին եւ նահատակների ազգակիցներին փոխանցելով մեր խորզգաց ցաւակցութիւնները, նրանց համար Ամենակարող Աստծուց երկնային խաղաղութիւն ենք հայցում։
Մենք ուժեղ կերպով դատապարտում ենք իսրայէլական հակապաղեստինեան այս անմարդկային արշաւանքը, որին զոհ գնացին հազարաւոր երեխաներ, ազնիւ մարդիկ։ Զգում ենք դառնութիւնը Պաղեստինի ժողովրդի եւ խորապէս ցաւակցում Պաղեստինի աղնիւ եւ մարտունակ ժողովրդին,որ 1948 թւից ի վեր տառապում է իսրայէլեան բռնութիւնից։
ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ