Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



Սրբազան Հօր զրոյցը Վեհափառ Հայրապետի պաշտօնական այցի մասին

Ստորև ներկայացնում ենք «Ալիք»-ի հարցազրոյցը Թեհրանի հայոց թեմի առաջնորդ Գերշ. Տ. Սեպուհ Ս. արք. Սարգսեանի հետ, կապւած Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա Վեհափառ Հայրապետի այցի նպատակների մասին: Վեհափառ Հայրապետը թւականիս դեկտեմբերի 12-ին այցելելու է Իրան: 

Սրբազան Հայր՝ «Մեր թեմի համար վստահաբար ցնծութեան եւ ուրախութեան առիթ պիտի լինի առաջիկայ այցելութիւնը՝ Մեծի Տանն Կիլիկիոյ կաթողիկոս Ն. Ս. Օ. Տ. Տ. Արամ Ա Վեհափառի: Այսպիսով Վեհափառ Հայրապետը իր ութերորդ հովւապետական այցելութիւնը կը շնորհի իրանահայ մեր թեմերին եւ յատկապէս Թեհրանի թեմին: Այս անգամւայ այցելութիւնը հիմնական երկու նպատակներով է՝ առաջին առիթը՝ Իսլամական մշակոյթի եւ միջազգային հաղորդակցութեան կազմակերպութեան եւ Մեծի Տանն Կիլիկիոյ կաթողիկոսութեան հերթական երկխօսութեան համագումարն է, որը այս անգամ կայանալու է Թեհրանում եւ հետեւաբար այդ կազմակերպութեան յատուկ հրաւէրով Վեհափառ Հայրապետը այցելելու է Թեհրան, մասնակցելու կազմակերպւած սեմինարին, որը կայանալու է դեկտեմբերի 13-ին եւ 14-ին:

Երկրորդ առիթը՝ 2015 թւականին Վեհափառ Հայրապետի ընտրութեան եւ օծման 20-ամեակն էր: Սակայն քանի որ 2015-ը ամբողջութեամբ նւիրւած էր Հայոց Ցեղասպանութեան 100-րդ տարելիցին, Վեհափառ Հայրապետը ընդհանրապէս չցանկացաւ, որ այդ ուղղութեամբ խօսք անգամ գնայ, հետեւաբար Կիլիկիոյ կաթողիկոսութեան ազգային Կենտրոնական վարչութեան կրօնական ժողովը 2015-ի դեկտեմբերին իր նիստերից մէկում թեմերին թելադրեց, որ յատուկ հանդիսաւորութեամբ կատարեն Վեհափառ Հայրապետի ընտրութեան եւ օծման 20-ամեակի տօնակատարութիւնները: Որոշումը այնպիսին էր, որպէս ընդառաջում Վեհափառ Հայրապետի փափագին, որ իւրաքանչիւր թեմի կամ շրջանի գլխաւոր կենտրոնում տեղի ունենան այդ տօնակատարութիւնները, ուստի զանազան թեմերում այդ տօնակատարութիւնները կայացան, երեւի վերջինը Թեհրանում է: Արդարեւ իրանահայ երեք թեմերի միասնական աշխատանքով Վեհափառ Հայրապետի ընտրութեան եւ օծման 20-ամեակը նշւելու է իր Թեհրան կեցութեան միջոցին:

Մեզ համար միշտ յատուկ ուրախութիւն, երջանկութիւն, պատիւ եւ օրհնաբեր առիթ է Վեհափառ Հայրապետի այցելութիւնը: Ընդհանրապէս հովւապետերի այցելութիւնը ժողովրդի եւ եկեղեցու կեանքում դիտւած են որպէս հոգեւոր, գեղեցիկ երեւոյթ, որով հովւապետ-ժողովուրդ յարաբերութիւնը աւելի է սերտանում, աւելիով ամրապնդւում եւ առիթ է լինում Քրիստոնէական հաւատքի եւ քրիստոնէական կեանքի առաւել աշխուժացման: Իսկ Արամ կաթողիկոսի պարագային, բնականաբար բոլորս էլ գիտենք, որ անցնող 20 տարիների ընթացքում նա իր հովւապետական գաւազանը ձեռքն առած ոչ միայն իր ժողովրդին հովւապետական այցելութիւններ է շնորհել, այլ նաեւ միջազգային ատեանների, միջազգային համագումարների հարթակների վրայ գտնւելով, պաշտպանը հանդիսացել իր ժողովրդի արդար դատի ու նաեւ ներկայացրել մեր ժողովրդի արդար իրաւունքների հարցը: Ես կարծում եմ, որ այդ իմաստով նրան կարելի է կոչել մեր օրերի Խրիմեան Հայրիկը: Վեհափառ Հայրապետը քաջ ու արի քայլ կատարեց, թուրքական Սահմանադրական դատարանի մօտ Սիսի կաթողիկոսութեան պահանջը ներկայացնելով եւ այդ ձեւով Հայոց Դատը եւ մեր պահանջատիրական պայքարը իրաւական հարթակի վրայ դնելով: Սա մեծ քայլ էր, բնականաբար Վեհափառ Հայրապետը քաջատեղեակ է, որ Թուրքիան ոսկեայ ափսէի վրայ դրւած մեր իրաւունքները չի մատուցելու մեզ, բայց կարեւորը մեր ժողովրդի գիտակցութեան մէջ իր պահանջատիրական պայքարի ոգին կենդանի պահելն է: Իսկ երկրորդը՝ արար աշխարհին ապացուցել, որ մենք երբեք չենք մոռացել եւ չենք մոռանալու մեր դատը եւ պէտք է մնանք պահանջատէր այնքան ժամանակ, որ մեր իրաւունքները խլւած են մեզանից եւ կենթադրեմ, որ սա հոգեւոր եւ քաղաքական մեր իշխանութեանց առաջնահերթութիւններից ամենակարեւորն է եւ միշտ պէտք է մնայ առաջինը: Այս իմաստով եւս ուրախութեամբ պէտք է դիմաւորենք Վեհափառ Հայրապետին, իրենից լսելու եւ իրենով մէկ անգամ եւս ջրդեղելու մեր ազգային ապրումներն ու զգացումները:

Վեհափառի անձի միջից դիմաւորելու ենք «Հաւատքի առաքեալը», «Հայ Դատի գահակիրը»:

Վեհափառ Հայրապետին դիմաւորելիս պիտի ողջունենք մտաւորականն ու անխոնջ սպասաւորն ու տարածիչը հայ գրի ու գրականութեան:

Վեհափառ Հայրապետը գալիս է մեզ մօտ իբրեւ միջեկեղեցական ու միջկրօնական յարաբերութեան ռահվիրան, որ ոսկեայ շղթայի նման իրար է կամրջել ու կամրջում եկեղեցիներն ու կենդանի կրօնների հետեւորդները:

Եւ վերջապէս դիմաւորելու ենք հայոց հայրապետին, մեր հայրիկին իր հայրութեամբ զօրանալու ու ամրանալու մեր կոչումի ու առաքելութեան մէջ»:

 

ՏՕՆԵՐ

Կրօնական Տօների Օրացոյց


Երկուշաբթի 25 Մարտի 2024;
Աւագ երկուշաբթի

Երեքշաբթի 26 Մարտի 2024;
Աւագ երեքշաբթի

Չորեքշաբթի 27 Մարտի 2024;
Աւագ չորեքշաբթի

Հինգշաբթի 28 Մարտի 2024;
Աւագ հինգշաբթի

Ուրբաթ 29 Մարտի 2024;
Աւագ ուրբաթ

Շաբաթ 30 Մարտի 2024;
Ճրագալոյց

Կիրակի 31 Մարտի 2024;
Սուրբ Յարութիւն կամ Զատիկ

Կիրակի 07 Ապրիլի 2024;
Կրկնազատիկ եւ Աւետումն Սուրբ Կոյս Մարիամ Աստւածածնի

Կիրակի 14 Ապրիլի 2024;
Կանաչ կամ Աշխարհամատրան Կիրակի

Կիրակի 28 Ապրիլի 2024;
Սուրբ Խաչի Երեւման Տօն

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ