Թւականիս, երկուշաբթի 10 յունւարի երեկոյեան ժամը 7:00-ին, Ազգային Առաջնորդարանի իր գրասենեակում Թեմիս Առաջնորդ Գերշ. Տ. Սեպուհ Ս. Արք. Սարգսեանը հիւրընկալեց Հ. Հ. Ազգային Ժողովի փոխ նախագահ պրն. Էդվարդ Շարմազանովին, որը պաշտօնական հանգամանքով եկել էր ցաւակցելու այաթ. Հաշեմի Ռաֆսանջանու մահւան տխուր առիթով:
Այցելութեան ներկայ էին նաեւ Հայաստանի Դեսպան՝ պրն. Արտաշէս Թումանեանը, Դեսպանատան մշակութային կցորդի խորհրդական՝ պրն. Սահակ Եղիազարեանն ու այս օրերին Իրանում գտնւող Հ. Հ. Ուժանիւթի փոխ նախարար պրն. Հայկ Յարութիւնեանն ու նրա գործընկերը: Առաջնորդ Սրբազան Հօրը ընկերակցում էին առաջնորդական փոխանորդ՝ Գերշ. Տ. Մակար Ս. եպս. Աշգարեանն ու հիւրաբար Թեհրանում գտնւող Գերշ. Տ. Մեղրիկ Ս. եպս. Բարիքեանը:
Առաջնորդ Սրբազան Հայրը ջերմօրէն ողջունեց հիւրերին եւ մտերմիկ ու բազմաբնոյթ նկարագիր ունեցող խօսակցութեանց առընթեր նա նաեւ հարուստ տեղեկութիւններ փոխանցեց ներկաներին, թէ Իրանահայութեան մասին ընդհանրապէս եւ թէ Թեհրանահայ գաղութի մասին ի մասնաւորի:
