Շաբաթ թւականիս յունւարի 29-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Հ.Մ. «Սիփան» Միութեան նորընտիր վարչութեան անդամներին, ովքեր եկել էին իրենց գործունէութեան առաջին հանգրւանում Սրբազան Հօր օրհնութիւնն ստանալու եւ լսելու իր թելադրութիւններն եւ ուղղութիւնները:
Հինգշաբթի թւականիս յունւարի 27-ին, Թեմիս Առաջնորդ՝ Գերշ. Տ. Սեպուհ Ս. Արք. Սարգսեանն իր գրասենեակում ընդունեց, Ի.Ի.Հ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանին եւ խիստ կարեւորեց Պատգամաւորի նման հանդիպումները Սրբազանի հետ:
Այսու ուրախութեամբ՝ մեր խորին շնորհաւորանքներն եւ բարեմաղթանքներն ենք յղում Ամիր-քաբիր արդիւնաբերական համալսարանի Էլեկտրատեխնիկական ֆակուլտետի հայ անւանի դասախօս եւ խելացի ցանցերի եւ էներգահամակարգերի ոլորտում հանրայայտ հետազօտող՝ ՊՐՈՖ. ԳԷՈՐԳ ԿԱՐԱՊԵՏԵԱՆԻՆ՝ «Բաշխիչ ցանցերում միկրոցանցերի յաճախականութեան վերահսկման բարելաւում» թեման ուսումնասիրելու բերումով, Համաշխարհային ճարտարագիտական մեծագոյն ասոցիացիայի՝ Էլեկտրական և էլեկտրոնիկայի ինժեներների ինստիտուտի (IEEE) կողմից, որպէս 2022 թւականի յունւար ամսւայ ականաւոր հեղինակ ներկայացւելու, Իր հպարտալի ձեռքբերման եւ յաջողութեան առիթով:
Յատկանշական է, որ պրոֆ. Կարապետեանը եղել է ժամանակի Պատգամաւորական ժողովի պատգամաւոր, նաեւ Կրթական խորհրդի անդամ եւ ընդմիշտ իր սերտ համագործակցութիւնն եւ ակտիւ մասնակցութիւնն է ունեցել համայնքիս ազգային եւ հասարակական կեանքում:
Այս հպարտալի առիթով՝ կրկին անգամ շնորհաւորում ենք իրանահայ անւանի գիտնական պրոֆ. Գէորգ Կարապետեանին եւ մաղթում նորանոր նւաճումներ եւ յաջողութիւններ:
Թ.Հ.Թ. ԹԵՄԱԿԱՆ ԽՈՐՀՈՒՐԴ
Չորեքշաբթի թւականիս յունւար 26-ին, Իրանի Իսլ. Հանրապետութիւնում հաւատարմագրւած Հայաստանի Հանրապետութեան Արտակարգ եւ Լիազօր նորանշանակ դեսպան Արսէն Աւագեանը, իր ազնւափայլ Տիկնոջ եւ դեսպանութեան դիւանագիտական անձնակազմի ընկերակցութեամբ, պաշտօնական այցելութիւն ունեցան Ազգային Առաջնորդարան եւ հանդիպեցին թեմիս Առաջնորդ Տ. Սեպուհ Ս. Արք. Սարգսեանին եւ Ազգային մարմինների ներկայացուցիչներին:
Չորեքշաբթի թւականիս յունւարի 26-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Ի.Ի. Հանրապետութիւնում հաւատարմագրւած Դանիայի թագաւորութեան Դեսպան Նորին Վսեմութիւն Ժասփար Վահրին:
Երկուշաբթի թւականիս յունւարի 24-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Հայ Բարեգործական Ընդհանուր Միութեան Թեհրանի մասնաճիւղի Վարչութեան անդամներին, ովքեր եկել էին Նոր Տարւայ եւ Ս. Ծննդեան տօների առիթով, շնորհաւորանքները եւ բարեմաղթանքները փոխանցելու Սրբազան Հօրը:
Կիրակի թւականիս յունւարի 23-ին, Թեհրանի բոլոր եկեղեցիներում ի բացառեալ Ս. Գէորգ եկեղեցու յընթացս Սուրբ եւ Անմահ Պատարագի յատուկ հանդիսաւորութեամբ ընթերցւեց Ն.Ս.Օ.Տ.Տ. Արամ Ա. Կաթողիկոսի պատգամը, որով Վեհափառ Հայրապետը 2022 տարին անւանակոչում է «ՍՓԻՒՌՔԻ ՏԱՐԻ»։
Շաբաթ թւականիս յունւարի 22-ին, Կրթական խորհրդի ատենապետ Ալֆրէդ Կարապետեանը հերթական հանդիպումն ունեցաւ թեմիս Առաջնորդ Գերշ. Տ. Սեպուհ Ս. Արք. Սարգսեանի հետ:
Շաբաթ, թւականիս յունւարի 22-ին, Թեհրանի Հայոց Թեմի Բարեխնամ Առաջնորդ Գերշ. Սեպուհ Ս. Արք. Սարգսեանը իր գրասենեակում հիւրընկալեց ժամանակի Ներքին գործոց նախարարութեան կազմակերպութիւնների եւ խմբակցութիւնների յանձնաժողովների տնօրէն, անցեալ շրջանում Քաղխորհրդի անդամ եւ ներկայիս «Նիմրուզ» ամսագրի ղեկավար պրն. ՀաղշԷնասին եւ իր գործընկերներ՝ պրն. Մորթեզա Ռահիմ Նաւազին, օր. Բեհնազ Շոհանին եւ օր. Սանազ Արինֆարին, ովքեր եկել էին Նոր Տարւայ եւ Ս. Ծննդեան տօների առիթով, շնորհաւորանքները եւ բարեմաղթանքները փոխանցելու Սրբազան Հօրը:
Շաբաթ թւականիս յունւարի 22-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց «Հուսկ» Հաստատութեան Հայ դատի յանձնախմբի նախագահ Իսիկ Իւնանէսեանին, ով եկել էր Նոր Տարւայ եւ Ս. Ծննդեան տօների առիթով, շնորհաւորանքները եւ բարեմաղթանքները փոխանցելու Սրբազան Հօրը եւ նաեւ Սրբազանին տեղեակ պահելու Հաստատութեան վերջին շրջանի գործունէութեան մասին ընդգծելով նաեւ, որ այս տարի լրանում է Հայկական հարցերի Ուսումնասիրութեան կենտրոն՝ «ՀՈՒՍԿ» հաստատութեան հիմնադրութեան 40-ամեակ եւ այդ ուղղութեամբ ծրագրել են յատուկ ձեռնարկներով եւ հրատարակչական աշխատանքներով մեր ժողովրդի գիտակցութեան մէջ ամրագրել յիշեալ հաստատութեան դերն ու առաքելութիւնը: