Թեհրանի Հայ Կանանց Բարեգործական Ընկերութիւնը թեհրանահայ գաղութի ամենահին կանանց միութիւնն է որ 110 տարիներից ի վեր գործում է եւ գործով ծառայում է մեր գաղութի կարիքաւոր ընտանիքներին:

Ուրբաթ 4 դեկտեմբեր 2015-ի երեկոյեան Հայ Կանանց Բարեգործական ընկերութիւնը նշեց իր հիմնադրութեան 110-ամեակը Արարատ Մարզաւանի Վաչէ Ղարաբէգեան սրահում ի ներկայութեան նկատառելի թւով համակիրների եւ անդամների:

Հանդիսութեան ներկայ էր թեմիս Առաջնորդ Գերշ. Տ. Սեպուհ Ս. Արք. Սարգսեանը, հայ կաթողիկէ համայնքի հոգեւոր Առաջնորդ Գերապայծառ Նշան Արք. Գարաքեհէյեանը, վերապատւելի Միշել Աղամալեանն ու միութիւնների ներկայացուցիչներ եւ հիւրեր:

Գեղարւեստական յայտագրի աւարտին թեմիս Առաջնորդ Սրբազան հայրը հրաւիրւեց իր խօսքը փոխանցելու: Սրբազան հայրը նախ գնահատեց Հ.Կ.Բ.Ը վարչութիւնը իր այս նախաձեռնութեան համար եւ ապա բացատրեց էութիւնը բարեգործութեան, որը աստւածահաճ արարք է եւ իր արմատներն ունի ժողովուրդների պատմութեան մէջ:

«Բարեգործութիւնը իրական ու վաւերական ճամբան է մարդս առ Աստւած առաջնորդող, ասաց Սրբազան հայրը եւ Հ.Կ.Բ.Ը-ը իր ծառայութեամբ ու աստւածահաճ առաքելութեամբ հանդիսանում է մեր կեանքի ՛՛Բարի Սամարացին՛՛» եզրակացրեց Սրբազան հայրը եւ ապա վերջում կոչ ուղղեց ներկաներին եւ ներկաների միջոցաւ մեր ժողովրդի բոլոր զաւակներին, որ հարազատների թաղման կամ հոգեհանգստեան արարողութիւնների առիթով փոխան ծաղկեպսակ եւ հոգեճաշի նւիրատւութիւններ անեն մեր բարեսիրական ու բարեգործական միութիւններին, յատկապէս այս օրերին երբ որեւէ մէկ ժամանակից աւելի գաղութը իր բոլոր կառոյցներով եւ միութիւններով կարիքն ունի նիւթական ներդրումներին: