ՆՈՐ ՏԱՐՒԱՅ ՊԱՏԳԱՄ

Նոր տարւայ առաջին այս պահին քրիստոնէական ջերմ սիրով եւ առ Աստւած բարձրացւած գոհաբանական աղօթքով շնորհաւորում եմ ձեզ բոլորդ, սիրելի քոյրեր եւ եղբայրներ, ձեզ, որ այս պահին մեզ հետ նւիրական այս սուրբ տաճարում էք որպէս աղօթակիցներ եւ ձեզ՝ սիրելիներ, որտեղ, որ կաք եւ ի սրտէ ցանկանում բոլորիդ արեւաշող Ամանոր, պայծառ օրեր եւ կենսուրախ ու աստւածահաճ տարի:

Այս օրերին ողջ մարդկութիւնը, կրկին անգամ, տօնում է նոր տարին նոր յոյսերով ու վերանորոգ հաւատքով: Մի նոր կեանքի առաջ ենք կանգնած. հինը անցաւ եւ նորն է գալիս. սակայն հինը դեռ յամենում է իր տագնապներով, ալեկոծումներով, խռովութիւններով, դէս ու դէն տեղի ունեցող պատերազմներով: Աշխարհը այսօր որեւէ մէկ ժամանակից աւելի կարիքը ունի մի պահ կանգնելու, դիտելու իր շրջապատը եւ հարց տալու ինքն իրեն, ինչո՞ւ այս վիճակը, չէ՞ որ Աստւած ամէն ինչ բարի ստեղծեց:

Այո՛, Աստւած ամէն ինչ բարի ստեղծեց. աստւածաստեղծ մարդը ինք սակայն, մեր նախահօր Ադամից սկսեալ, իր անհնազանդութեամբ ու եսասիրութեամբ հեռացաւ Աստծուց պատճառ դառնալով մեղքի եւ նրա հետեւանք եղող մահւան: Տագնապահար, ալեկոծեալ ու խռովեալ աշխարհը նմանւել է անծայրածիր անապատում ուղեկորոյս մի մարդու, որ իր չորս կողմն է դիտում, հորիզոնին է նայում այնտեղից լոյսի եւ յոյսի նշոյլ գտնելու ակնկալութեամբ: Ահաբեկչական արարքներն ու գործողութիւնները, պետութիւնների միմիանց նկատմամբ հետզհետէ աճող անվստահութիւնը աստւածապաշտ մարդկութիւնը, առաւել եւս քրիստոնեայ աշխարհը մղում է աղօթքի, ապաշխարողական կեանքի, Սէր-Քրիստոսին իր հոգում ծնցնելու յանուն իրական խաղաղութեան:

Անցեալ 2015 տարին մեր ժողովրդի համար եղաւ Հայոց Ցեղասպանութեան ոգեկոչման արարողութիւններով, հանդիսութիւններով, բազմաբնոյթ գիտական, մշակութային եւ ընկերային ձեռնարկներով յագեցւած ժամանակահատւած, որի ընթացքին վկաները եղանք աշխարհի խաղաղասէր պետութիւնների նախագահների, վարչապետների, ներկայացուցիչների, եկեղեցիների հոգեւոր պետերի, միջազգային կազմակերպութիւնների զօրակցութեան եւ մասնակցութեան Հայոց Ցեղասպանութեան նահատակների ոգեկոչման արարողութեանց եւ ձեռնարկների. մի երեւոյթ, որ մխիթարական էր եւ մեծապէս գնահատելի: 

Նոր տարւայ խորհրդի առաջ կանգնած մտաբերում ենք հեթանոսաց առաքեալի՝ Ս. Պօղոսի նամակը գրւած Եփեսացիներին, որտեղ նա կարեւորութեամբ թելադրում է նրանց.- ՛՛ Մոռացէ՛ք ձեր հին ինքնութիւնը, այսինքն ձեր նախկին ապրելակերպը, որ ապականւած է խաբուսիկ ցանկութիւններով, վերանորոգւեցէք հոգով՝ փոխելով ձեր մտածելակերպը, եղէք նոր մարդ ստեղծւած Աստծու պատկերի համաձայն եւ ճշմարիտ կեանքը ապրեցէք արդարութեամբ ու սրբութեամբ՛՛(Եփ. 4:22-29): Առաքեալը յիշեցնում է, որ նորոգւած կեանքով ու Տիրոջ միացած մարդը կարողանում է ապրել լոյսի որդիներին վայել ձեւով եւ վերածւում բարութեան, արդարութեան եւ ճշմարտութեան շտեմարանին:

Սիրելի հաւատացեալ քոյրեր եւ եղբայրներ,

Այսօրւայ աշխարհը, որի անբաժան մասնիկն ենք եւ մենք, կոչւած է առաւել զգաստութեամբ, պատասխանատւութեամբ, յանձնառութեամբ ու երկիւղածութեամբ ականջ տալու երկնային էակների՝ հրեշտակների քաղցրահնչիւն օրհնաբանութեան.

Փա՜ռք Աստծուն՝ բարձունքներում,
Խաղաղութիւն երկրի վրայ եւ
Հաճութիւն մարդկանց միջեւ.

Սիրոյ, խաղաղութեան, փոխադարձ յարգանքի եւ հանդուրժողականութեան զգացումներով լցւած շնորհաւորենք միմիանց նոր տարւայ առիթով միմիանց ցանկանալով կեանքում ամենից գեղեցիկն ու կատարեալը եւ աշխարհին էլ խաղաղութիւն եւ հաճութիւն.

Ամէն