Թեհրանի թեմի Կրօնական Խորհրդի կողմից կեանքի կոչւած Երիտասարդաց Յանձնախումբը իր անդրանիկ նիստը գումարեց ուրբաթ 2 հոկտեմբեր 2015-ի երեկոյեան ժամը 6:00-ին Ազգային Առաջնորդարանի դահլիճում, հովանաւորութեամբ Թ. Հ. Թ. առաջնորդ Գերշ. Տ. Սեպուհ Ս. Արք. Սարգսեանի:
Ժողովը աղօթքով սկսեց իր աշխատանքներին: Առաջնորդ Սրբազան հայրը ջերմօրէն ողջունեց բոլորին եւ գնահատեց նրանց միասնաբար Տէրունական Աղօթքը արտասանելու համար: Այնուհետ Սրբազան հայրը կարեւորութեամբ խօսեց Յանձնախմբի առաքելութեան եւ որոշ տեղեցութիւններ տւեց միջ-եկեղեցական կառոյցների մասին եւ այդ կառոյցների կողմից կազմակերպած շրջանային եւ միջազգային համաժողովներին մեր երիտասարդութեան մասնակցութեան եւ ունեցած գործօն մասնակցութեան մասին:
Ներածական այս բացատրութիւնից յետոյ Սրբազանը հրաւիրեց ժողովականներին ընտրելու իրենց դիւանը: Յետ կարճատեւ խորհրդակցութեան ժողովը ընտրեց իր դիւանը հետեւեալ ձեւով.
- Ագաթա Աբրահամեան` Ատենապետ
- Անիա Խուդաբախշեան` Ատենադպիր
- Սարգիս Աբեդի` Նիւթականի պատասխանատու
Սրբազան հայրը շնորհաւորեց նորընտիր դիւանը, յաջողութիւն մաղթեց յիշեցնելով բոլորին որ Յանձնախմբի ամէն մի անդամ ինքն իրեն որպէս ատենապետ, ատենադպիր եւ նիւթականի պատասխանատու զգալու է եւ ըստ այնմ գործելու, էականը լաւ դիւան ունենալը չէ, այլ բոլոր անդամների համատեղ գործակցութիւնն է կարեւոր:
Սրբազան հայրը թելադրեց, որ Յանձնախումբը կազմի իր տարեկան ծրագիրը եւ այնուհետեւ հետամուտ լինի նրա գործադրութեան: