ՀԱՄԱՇԽԱՐՀԱՅԻՆ ԿԱՆԱՆՑ ԱՂՕԹՔԻ ՕՐ ԹԵՀՐԱՆՈՒՄ

Մարդկային կեանքի յաջողութիւնը կախումնաւորւած է փոխադարձ հասկացողութեան վրայ հիմնւած երկխօսութեան վրայ։ Նոյնպէս էլ հաւատքի ու հոգեւոր կեանքում մարդ-Աստւած յարաբերութեան կեանքի յաջողութիւնը մեծապէս կախեալ է հաւատացեալի իր Արարիչ Հօր եւ մարդասէր Աստծու հետ ունեցած մտերմիկ, անկեղծ, կենդանի եւ ջերմեռանդ երկխօսութիւնից, այսինքն՝ աղօթքից։

Երկուշաբթի, 5 Մարտ 2018-ի առաւօտեան Ս. Սարգիս առաջնորդանիստ մայր եկեղեցում երկու հարիւրից աւել կանանց մասնակցութեամբ տեղի ունեցաւ «Համաշխարհային Կանանց Աղօթքի Օր»ւայ առիթով աղօթքի արարողութիւնը։

Սոյն աղօթքի արարողութիւնը կազմակերպւել էր Թ. Հ. Թ. Քրիստոնէական Դաստիարակութեան Բաժանմունքի կողմից հովանաւորութեամբ, տնօրինումով ու նախագահութեամբ թեմիս առաջնորդ՝ Գերշ. Տ. Սեպուհ Ս. Արք. Սարգսեանի։

Թէեւ իր տեսակի մէջ սոյն աղօթակարգը առաջին անգամն էր, որ Թեհրանում կատարւեց, սակայն Կանանց Համաշխարհային Աղօթքի օրը արդէն գեղեցիկ աւանդութիւն դարձած՝ տասնամեակներ է, որ տեղի է ունենում Արեւմուտքում, Եւրոպայում եւ այլ ցամաքամասերում, ամէն տարի Մարտ ամսւայ առաջին ուրբաթը նկատի ունենալով, ամէն անգամ մի երկրում եւ մի թեմայի շուրջ հաւաքւելով՝ խորհրդածում են եւ յատուկ աղօթք են կատարում բազմահազար կանանց ներկայութեամբ եւ մասնակցութեամբ։

Թեմիս Առաջնորդ Սրբազան հայրը փափագեց նոյն գեղեցիկ դաստիարակիչ սովորութիւնը այստեղ էլ ի գործ դնել, որպէսզի մեր համայնքի կանայք էլ հաւաքւելով՝ միասին աղօթեն, միասին երգեն եւ այդ ձեւով իրենց մասնակցութիւնը բերեն համաշխարհային մաշտապով կատարւած այդ գեղեցիկ նախաձեռնութեան, աղօթակից, զօրավիգ, ուրախակից եւ ցաւակից լինելով ամենուր իրենց քոյրերին, հաւատակիցներին։

Նկատի ունենալով, որ Թեհրանում ուրբաթ օրերը պատարագ է տեղի ունենում, այդ պատճառով որոշւեց Մարտ ամսւայ առաջին ուրբաթ օրւայ ամենամօտիկ եւ յարմար օրը կատարել սոյն աղօթքի օրը։ Որպէս սկիզբ դա կատարւեց Ս. Սարգիս եկեղեցում, բայց յառաջիկայ տարիներին լինելու է տարբեր եկեղեցիներում։ Աղօթքի օրւան ներկայ էին նաեւ թեմումս ծառայող քահանայ հայրերը։

Աղօթքի օրւայ ծրագիրը ընդգրկում էր ՛՛Արեւագալի՛՛ ժամերգութիւն, ՛՛Հաւաքական զղջում՛՛, ՛՛Հաւատամք՛՛, ՛՛Տէր ողորմեա՛՛, օրւայ առիթով նկատի առնւած 9 աղօթքներ եւ մեղեդիներ, շարականներ ու քարոզ։

Աղօթքների ընթերցումների գծով իրենց մասնակցութիւնը բերեցին՝
«Հայ կին» միութիւնից՝ Ժաքլին Չարմահալին,
Հայ կին միութեան կից «Անի» միութիւնից՝ Քլոդէթ Տ. Յովսէփեանը,
Հայ կին միութեան կից «Անահիտ» միութիւնից՝ Արմիկ Դաւթեանը,
Հայ կին միութեան կից «Արմենուհի» միութիւնից՝ Անահիտ Թորոսեանը,
«Թեհրանի կանանց եկեղեցասէր» միութիւնից՝ Մարի Մարտիրոսեանը,
«Սրբ. Թարգմանչաց եկեղեցու եկեղեցասէր կանանց» միութիւնից՝ Արփի Զարեհը,
«Հայ կանանց բարեգործական» ընկերութիւնից՝ Անահիտ Զարգարեանը և
«Հ. Բ. Ը.» միութեան կանանց մասնաճիւղից՝ Ռիթա Յակոբեանը։

Իսկ շարականների երգեցողութիւնը կատարեցին՝
Ապաշխարութեան շարականներ` Գերշ. Տ. Մակար Ս. Եպս. Աշգարեանը
Աստւածածնայ նւիրւած զոյգ տաղեր «Մայր եւ կոյս» եւ «Անկանիմք առաջի քո Աստւածածին» Տկն. ՕՖիկ Մելիքեանը։

Մեծապէս գնահատելի էր ներկայութիւնը սիրելի կանանց եւ մանաւանդ նրանց լուրջ հետեւութիւնն ու արարողութեան մասնակցութիւնը։ Արարողութեան վերջին բաժնով Առաջնորդ Սրբազան հայրը օրւայ առիթով իր քարոզն ու պատգամը փոխանցեց ներկաներին, յատուկ կերպով անդրադառնալով նախաձեռնութեան համաշխարհային բնոյթի պատմականին ու մանաւանդ նպատակին։ Նա իր քարոզում կարեւորութեամբ խօսեց աղօթքի ունեցած հրաշագործ զօրութեանը եւ դերակատարութեանը, անհատի, հաւաքականութեան ինչու չէ նաեւ ազգի կեանքի վրայ, կենդանի օրինակներ յիշելով թէ համաքրիստոնէական պատմութիւնից եւ թէ մեր ազգի պատմութիւնից եւ հրաւիրեց բոլորին, որ միշտ աղօթեն, անձանձրոյթ աղօթեն եւ ամբողջական հոգով, մտքով ու մարմնով Աստծուն տրամադրւածութեամբ աղօթեն, որպէսզի մեր աղօթքներով Աստծու գանձարանից օրհնութիւններ ու բարիքներ հրաւիրենք մեր անձերին, ընտանիքներին, ազգին, հայրենիքին եւ ողջ աշխարհի համար։ Նա յիշեցրեց, որ ամէն ժամանակից աւելի մարդկային ընկերութիւնը աղօթքի կարիք ունի, ուստի թելադրեց, որ մեր հաւատի հիմնադրին ու այն կատարելագործողին Յիսուսի Քրիստոսի պատւերին հետեւելով՝ աղօթենք եւ աղօթենք միշտ եւ աղօթենք առանց ձանձրանալու։

՛՛Աղօթքով Արարիչն ու արարածը փոխ յարաբերութեան մէջ են մտնում՛՛ ՛՛Աղօթքը փառաբանանք է Աստծուն ուղղւած, այն սիրոյ կամուրջն է Աստծու եւ մարդու միջեւ՛՛ ասաց Սրբազան հայրը։ Այնուհետ Սրբազան հայրը անդրադարձաւ այս տարւայ թեմային «Աստծու ողջ ստեղծագործութիւնը շատ լաւ է»։ ՛՛Ծննդոց գրքում կարդում ենք, այն ինչ որ Աստւած ստեղծեց ՛՛տեսաւ որ բարի է՛՛, հետեւաբար մեր առաքելութիւնն է միշտ բարիի ձգտել, հետամուտ լինել՛՛ եզրակացրեց Սրբազան հայրը։

Թեհրանում տեղի ունեցած կանանց համաշխարհային աղօթքի օրւայ արարողութիւնը աւարտւեց հաւաքական «Տէրունական աղօթքի» երգակցութեամբ եւ Առաջնորդ Սրբազան հօր «Պահպանիչ»ով, շուրջ ժամը 11։00-ին։ Արարողութիւնից յետոյ Ս. Սարգիս եկեղեցու եկեղեցական խորհուրդը եկեղեցու բակում հիւրասիրեց ներկայ հաւատացեալ կանանց եւ ժողովրդին։


Թ.Հ.Թ Քրիստոնէական Դաստիարակութեան Բաժանմունք