Ուրբաթ Մայիս 11-ին, թանգարանների համաշխարհային օրւայ առիթով, Իրան ժամանած, Թանգարանների Միջազգային Կոմիտէի պետ՝ պրն. Ֆրանքոյս Մայրէզի (Francois Mairesse) գլխաւորութեամբ, Իրանի Թանգարանների Ազգային Կոմիտէի նախագահ և Հետազօտական Կենտրոնի խորհրդական՝ պրն. Մոհիթ Թաբաթաբային ու Իրանի Ինքնուս Արւեստագէտների Միութեան հիմնադիր և Իրանի Թանգարանների Ազգային Կոմիտէի պաշտօնական անդամ՝ Ալի Էզաթին, իրենց առաջին այցն ունեցան «Արտակ Մանուկեան» թանգարան:

Այցելութեանը ներկայ էր նաև Թ.Հ.Թ.-ի Թեմական Խորհրդի անդամ և թանգարանի կապ՝ պրն. Հարմիկ Աւետեանը:

Շաբաթ Մայիս 12-ին, դոկտ. Սիմոն Այւազեանի «Յուշեր» անւամբ ջրաներկ նկարչութիւնների ցուցահանդէսի բացումը կատարւեց, որտեղ ներկայ գտնւեցին նոյն խումբը նաև մի խումբ հանգստի կոչւած ուսուցիչներ և գեղարւեստասէր հայրենակիցներ: Ցուցահանդէսը շարունակւց մինչև Մայիս 18-ը:

Սոյն ցուցահանդէսի փակման օրը, ներկայ էին վաստակաշատ նկարիչ Լալիկ Թաշճեանը, «Խաղաղութեան Դեսպան» թանգարանի (موزه سفیران صلح) տնօրէնը, Հ.Մ. Սիփան միութեան վարչութեան անդամներից, «Հայ Կին» Միութեան կից «Արմենուհի» միութեան նախագահն ու վարչութեան անդամներից, նաև մի խումբ ճարտարագիտութեան ուսանողներ:

Ուրբաթ Մայիս 18-ին, թանգարանային համաշխարային օրւայ առիթով և բարձր հովանաւորութեամբ թեմիս բարեխնամ առաջնորդ՝ Գերշ. Տ. Սեպուհ Ս. Արք. Սարգսեանի, համագործակցելով Հ.Ճ.Ճ. Միութեան անդամների հետ, տեղի ունեցաւ «Հայ որբերի գորգը» գրքի, հայերէն և պարսկերէն լեզուներով թարգմանւած գրքերի շնորհանդէսը:

Շնորհանդէսի ձեռնարկին ներկայ էին Գերշ. Տ. Սեպուհ Ս. Արք. Սարգսեանը, Թ.Հ.Թ.-ի Թեմական Խորհրդի ատենապետ՝ պրն. Ռոբերթ Բեգլարեանը, թանգարանի կապ՝ պրն. Հարմիկ Աւետեանը, պաշտօնական հիւրեր և մի խումբ ճարտարապետ և ճարտարագէտներ, ընդհանուր շուրջ 70 հիւրեր:

«Արտակ Մանուկեան» թանգարան