Կիրակի 21 յուլիս 2019-ի առաւօտեան, յաւարտ Ս. եւ անմահ պատարագի, Ս. Սարգիս առաջնորդանիստ մայր եկեղեցում տեղի ունեցաւ յատուկ հոգեհանգստեան արարողութիւն, 2009 թւականի 15 յուլիսին Թեհրան-Երեւան օդանաւային դժբախտ արկածին զոհ գնացած անմեղ զոհերի հոգիների խաղաղութեան համար։

Կրօնական արարողութեանը նախագահեց եւ այս առիթով քարոզեց թեմիս առաջնորդ՝ Գերշ. Տ. Սեպուհ Ս. Արք. Սարգսեանը։

Հոգեհանգիստից առաջ Առաջնորդ Սրբազան հայրը յաւուր պատշաճի իր քարոզի մէջ անդրադարձաւ 10 տարիներ առաջ, 168 անմեղ ճամբորդների մահւան մասին, որոնցից 48-ը մեր Հայոց Առաքելական Եկեղեցու զաւակներն էին:

Սրբազան Հայրն իր քարոզի մէջ շեշտեց՝ «Այսօր յատուկ հոգեհանգիստ ենք կատարելու մեր գաղութի ամենադժւար և ամենածանր պատահարի զոհ գնացած 48 հայորդիների համար: Սոյն վթարին զոհ գնացին նաև մօտաւորապէս 120 իրանցի հայրենակիցներ: Այդ ահաւոր աղէտից բոլորս ցնցւեցինք: Մինչև հիմա էլ երբ յիշում ենք այդ օրերը, տագնապում ենք: Այդ տագնապը մեզ համար առիթ է, որ մենք մտածենք նրանց յիշատակի և հոգիների մասին և աղօթենք միևնոյն ժամանակ նրանց համար»:

Սրբազան Հայրը շարունակեց՝ «Այդ օրերին նրանց կոչեցի՝ ՛՛Կարօտի զոհեր՛՛, որովհետև կարօտով գնում էին Հայաստան, իրենց հայրենիքը տեսնելու և վայելելու երկրաւոր այն բարիքները, որոնք Աստւած մեզ համար ստեղծել է: Բայց կատարւեց անսպասելին և ահաւորը»: «Այժմ փառք ենք տալիս Աստծուն, որ Իր Աստւածային զօրութեամբ և Իր յատուկ ձևերով մխիթարեց մեզ և մխիթարում է. զօրացրեց մեզ և զօրացնում է: Հաւատում եմ, որ սա քրիստոնէական վեհ հաւատքի, սիրոյ և յոյսի արդիւնքն է: Հաւատք, որ մեզ կառչում է մեր կոչումին. սէր, որ մեզ մղում է մեր ննջեցեալների յիշատակով ապրելու և յոյս, որով մենք յուսում ենք, որ մենք էլ մի օր միանալու ենք իրենց»:

«Աղօթում եմ, որ Աստւած նրանց հոգիներն իր երկնային սուրբ խորաններում հանգչեցնի և նրանց ընտանեկան պարագաներին, նաև մեզ բոլորիս, շարունակի մխիթարութիւն և զօրութիւն, որպէսզի դրանցով մենք հասնենք Ս. Երրորդութեան յաւիտենականութեան: Այս առիթով աղօթում ենք նաև Իրանի և Իրանի ազնիւ ժողովրդի կեանքի խաղաղութեան և բարորութեան համար» - եզրակացրեց Սրբազան Հայրը: