Հայաստանի Հանրապետութեան Կրթութեան և Գիտութեան Նախարարութիւնը 2019 թւականի օգոստոսի 5-11-ը Հայաստանում կազմակերպել է Համահայկական Հայագիտական 9-րդ Օլիմպիադան:

Օլիմպիադայի նպատակն է նպաստել սփիւռքում հայագիտական ոլորտներում գիտելիքի տարածմանը, առողջ մրցակցային պայմաններում երեխաների ստեղծագործական դրսևորմանը, առաւել շնորհալի երեխաների յայտնաբերմանը, ստեղծել պայմաններ սփիւռքի տարբեր հատւածների, Հայաստանի և Արցախի երեխաների փոխճանաչման և ինքնաճանաչման համար, խթանել նրանց միջև ուղղակի շփումները:

Օլիմպիադային կարող են մասնակցել հայկական ու հայկական բաղադրիչով կրթութիւն իրականացնող հաստատութիւնների 14-18 տարեկան սաներ, որոնք անհրաժեշտ իմացութիւն ունեն առաջարկւող նիւթի շրջանակներում: Օլիմպիադան անցկացւելու է հայոց լեզւի, գրականութեան, պատմութեան և մշակոյթի պատմութեան իմացութեան շրջանակներում:

Ի հետևումն վերը նշւածի, Թ.Հ.Թ. Կրթական խորհրդի նախաձեռնութեամբ Թեհրանի Հայոց թեմից, շաբաթ 3 օգոստոս 2019 թւին, սոյն մրցութիւններին մասնակցելու նպատակով, ՀՀ մեկնեցին թւով 8 աշակերտ-ուհիներ՝ Սաթենիկ Շահիջանեանը, Նայիրա Եաղուբեանը, Փիւնէ Սարդարեանցը, Մելանի Խաչատրեանը, Լիա Դարուսին, Սելին Իսայեանը, Վահէ Աւանէսեանը և Սինթիա Փիրջանեանը:

Խմբին ընկերակցող պատասխանատուներն են՝ Աղաւնի Մինասեանը և Արսինէ Բոնիադեանը:

Աշակերտները օգոստոսի 2-ին, «Սուրբ Սարգիս» եկեղեցում, Սուրբ պատարագից և հաղորդութիւն ստանալուց յետոյ արժանացան Թեհրանի Հայոց Թեմի բարեխնամ առաջնորդ՝ գերշ. Տ. Սեպուհ Ս. արք. Սարգսեանի օրհնանքին: Սրբազան Հայրն աղօթագրքեր նւիրեց և իր բարեմաղթանքներով խրախուսեց աշակերտներին հայրենիքում լաւագոյնս հանդէս գալու և ներկայացնելու իրենց գիտելիքները:

Ներկայ էին նաև Կրթական Խորհրդի ատենապետ՝ Անէթ Բաղադասարեանը և խորհրդի անդամներից՝ Լորիս Մինասեանը: Հարկ է նշել, որ Կրթական Խորհրդի կողմից կազմակերպւել էր նախապատրաստական դասընթացներ հայոց լեզւի, գրականութեան, պատմութեան և մշակոյթի պատմութեան առարկաներից: Դասընթացները վարեցին Աղաւնի Մինասեանը և Նորվան Միքայէլեանը:

Յաջողութիւն ենք մաղթում մեր սիրելի աշակերտներին:

Թ.Հ.Թ. Կրթական Խորհուրդ