Դպրոցական վերամուտի նախօրեակին թեմիս առաջնորդ Գերշ. Տ. Սեպուհ Ս. Արք. Սարգսեան Ազգային Առաջնորդարանի դահլիճում ընդունեց Թեհրանի մեր դպրոցների կրօնի ուսուցիչներին, ներկայութեամբ Քրիստոնէական Դաստիարակութեան Բաժանմունքի պատասխանատու տկն. Շաքէ Եղիայեանի եւ Քրիստոնէական Դաստիարակութեան Յանձնախմբի ատենապետ օրդ. Անի Մանուկեանի։

Սրբազան հայրը ջերմօրէն ողջունեց ուսուցիչներին եւ յայտնեց, որ դժբախտաբար մեր աշակերտութեան թիւը նւազում է, հետեւաբար մենք էլ վերատեսութեան պիտի ենթարկենք մեր աշխատանքները։ Յառաջիկային Կրթական Խորհրդի հետ համախորհուրդ եւ դպրոցների տեսչութեանց հետ գործակցաբար դասաբաշխումները որոշ փոփոխութիւնների ենթարկւելու են։

Ուսուցիչները իրենց առաջարկութիւնները ներկայացուցին կրօնի դասագրքերի վերատեսութեան հետ կապւած։ Սրբազան հայրը կրօնի դասագրքերի վերատեսութեան համար ընտրւած յանձնախմբին թելադրեց որ նկատի ունենան բոլոր պարագաները եւ որքան կարելի է դասագրքերը դիւրամատչելի եւ հաղորդական դարձնեն։ Այնուհետ Սրբազան հայրը թելադրեց դասաւանդումը հաղորդական եւ այժմէական դարձնել։