ՏԵՂԵԿԱՆՔ

Ինչպէս արդէն տեղեակ էք, Չինաստանում բռնկած եւ մի շարք այլ երկրներում տարածւած կորոնավիրուս համաշխարհային համաճարակը, տարածում է ստացել նաեւ Իրանում, հետեւաբար հարկ ենք համարում շեշտաւորել, որ խուճապի չմատնւելով անհրաժեշտ է առաւել զգուշաւոր լինել եւ կատարել Առողջապահութեան կենտրոնի կողմից հաղորդւած յորդորները եւ խորհուրդները, կորոնավիրուս համաճարակից զերծ մնալու առնչութեամբ։

Այս ուղղութեամբ տեղեկացնում ենք, որ լուրը հաղորդւած առաջին իսկ օրւանից Թեմիս Թեմական խորհուրդի միջոցով կատարւել են հետեւեալ որոշումները եւ աշխատանքները՝
Թեմական խորհուրդը փետրւարի 23-ին կայացած նիստում, որոշում կայացրեց ժամանակաւոր դադարեցնել Խորհրդի հերթական նիստերը, հետեւաբար աշխատանքները տնօրինւում է հեռակայ՝ Ազգ. Առաջնորդարանի Դիւանապետի համագործակցութեամբ։

Թեմիս Առաջնորդ՝ Գերշ. Տ. Սեպուհ Ս. Արք. Սարգսեանի եւ Կրօնական խորհրդի հետ խորհրդակցելով որոշում ընդունւեց երկու շաբաթով առկախել Կրօնական բոլոր արարողութիւնները 29 փետրւարից սկսեալ։
Թեմիս աշխատող բոլոր միութիւններին ուղղութիւն տրւեց ժամանակաւոր դադարեցնել բոլոր մարզական եւ մշակութային միջոցառումները եւ ընթացիկ բոլոր աշխատանքները։

Հետեւելով երկրի վերջին իրադարձութիւններին, Ազգային Առաջնորդարանի աշխատանքային ժամերը մարտի 1-ից սկսեալ, ժամանակաւորապէս կրճատւելով, սահմանւել են՝ առ. ժամը 7։30-ից մինչեւ 13։00-ը։

Յատկանշական է նաեւ որ Թեմական խորհուրդի միջոցով Թեմիս Կրթական խորհրդին տրամադրւել է 100.000.000 ռիալ բիւդջէ, որպէսզի Խորհուրդը իր հայեցողութեամբ եւ յարմարագոյն ելքերը ուսումնասիրելով հնարաւորութիւն եւ ապահովութիւն ստեղծի դպրոցներում, հնարաւորինս համաճարակի տարածման կանխարգելման եւ աշակերտութեան առողջութիւնը ապահովելու կապակցութեամբ, որի աշխատանքը արդէն իսկ իրագործւել եւ բոլոր մանկապարտէզներին եւ հայոց դպրոցներին տրամադրւել են մի շարք անհրաժեշտ պարագաներ՝ պաշտպանիչ դիմակներ, միանւագ օգտագործման ձեռնոցներ նաեւ խոնաւ ալկոհոլային անձեռոցիկներ եւ առաջիկայում տրամադրւելու է նաեւ աւտոմատ ջերմաչափման համար նախատեսւած թւային ջերմաչափեր եւ ախտահանող նիւթեր, որոնք դպրոցների վերաբացւելուց յետոյ օգտագործւելու են բոլոր դպրոցներում։

ԹԵՀՐԱՆԻ ՀԱՅՈՑ ԹԵՄԻ
ԹԵՄԱԿԱՆ ԽՈՐՀՈՒՐԴ
Մարտ 2020