ԻՍԼԱՄԱԿԱՆ ԽՈՐՀՐԴԱՐԱՆԻ ՆՈՐԸՆՏԻՐ ՀԱՅ ՊԱՏԳԱՄԱՒՈՐՆԵՐԻ ԱՅՑԸ ԱՌԱՋՆՈՐԴ ՍՐԲԱԶԱՆԻՆ

Չորեքշաբթի 2 մարտ 2016-ի առաւօտեան թեմիս առաջնորդ Գերշ. Տ. Սեպուհ Ս. Արք. Սարգսեան առաջնորդարանի իր գրասենեակում ընդունեց Թեհրանի եւ հիւսիսային իրանահայութեան եւ Իսպահանի եւ հարաւային իրանահայութեան նորընտիր զոյգ պատգամաւորներին՝ դոկտ. Կարէն Խանլարեանին եւ պրն. Ժորժիկ Աբրահամեանին։

Սրբազան հայրը ջերմօրէն ողջունեց նորընտիր զոյգ պատգամաւորներին, շնորհաւորեց նրանց եւ օրհնաբեր ու ժողովրդանւէր ծառայութիւն մաղթեց նրանց։ «Ուրախալի երեւոյթ էր ժողովրդի խուռներամ մասնակցութիւնը ընտրութիւններին, ասաց Սրբազան հայրը, ինչ որ ցոյց է տալիս մեր ժողովրդի գիտակից ու պատասխանատու յանձնառութիւնն ու կառչւածութիւնը իրանեան իր ծննդավայր հայրենիքին եւ համայնքային իրաւունքների պահպանման եւ պաշտպանութեան»։ Նորընտիր պատգամաւորները իրենք եւս իրենց կարգին իրենց ուրախութիւնն ու գոհունակութիւնը արտայայտեցին այդ դրական երեւոյթի համար։ Սրբազան հայրը, մի անգամ եւս, շնորհաւորեց նրանց եւ արդիւնաշատ ու պատւաբեր ծառայութիւն մաղթեց իրանեան մեր ծննդավայր հայրենիքի եւ հայ համայնքին ու հայ եկեղեցուն։