ԹԵՄԱԿԱՆ ԽՈՐՀՐԴԻ ԱՏԵՆԱՊԵՏ ՃՐՏՊ. ՆՈՐԱՅՐ ԱՐԱՄԵԱՆԻ ՀԱՆԴԻՊՈՒՄԸ՝ ՀԱՅ ՀԱՍԱՐԱԿԱԿԱՆ ՄԻՈՒԹԵԱՆ ՎԱՐՉՈՒԹԵԱՆ ՀԵՏ

Երեքշաբթի, թւականիս օգոստոսի 30-ին, Թեմական խորհրդի ատենապետ եւ միութիւնների հետ կապ՝ ճրտպ. Նորայր Արամեանը, Հ. Հսրկն. Միութեան (Հայ Ակումբ)-ի կենտրոնատեղիում, հանդիպում ունեցաւ Վարչութեան անդամների հետ:

Հանդիպման ընթացքում Միութեան վարչութեան ատենապետ՝ Վահէ Գերասիմեանը հակիրճ զեկոյց ներկայացրեց Միութեան ընդհանուր գործունէութեան վերաբերեալ:

Պրն. Նորայր Արամեանը անդրադառնալով մի քանի տարի առաջ միութեան յարակից բազմայարկ աւտոկանգառի շինարարութեան ընթացքում վնաս պատճառւած եւ փլուզման ենթարկւած միութեան շէնքի հիմնական հատւածին եւ իրագործւած վերանորոգման աշխատանքներին ընդգծեց, որ անհրաժեշտ է հնարաւոր ելքեր փնտռել միութեան պահանջը աւելի լուրջ հետապնդելու եւ հնարաւորինս սեղմ ժամկէտում փոխհատուցում ստանալու կապակցութեամբ, որի համար խորհրդակցութիւն է եղել Ի. Իսլ. Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի հետ եւ որոշւել է յառաջիկայ շաբաթւայ ընթացքում աշխատանքները շարունակել:

Նշելի է, որ անցած տարիներին այս կապակցութեամբ երկար բանակցութիւններ են վարւել, սակայն վնաս պատճառող կողմը հաւատարիմ չի մնացել պայմանաւորւածութեանը եւ չի արձգանգել բազմիցս ներկայացւած ծախսերի հաշւեցոյցերին:

Հանդիպման աւարտին պրն. Նորայր Արամեանը գնահատեց Միութեան գործունէութիւնը եւ յաջողութիւն մաղթեց ապագայ աշխատանքներին:

Ազգային Առաջնորդարանի Հանրային կապ