Շաբաթ, ապրիլի 23-ին, Թեհրանի Ս. Սարգիս եկեղեցու շրջափակում գտնւող Մեծ Եղեռնի Յուշարձանի մօտ կատարւեց բարեխօսական աղօթք, ի յիշատակ Հայոց ցեղասպանութեան մէկ ու կէս միլիոն անմեղ զոհերի, նախագահութեամբ թեմիս առաջնորդ Գերշ. Տ. Սեպուհ Ս. Արք. Սարգսեանի:

Արարողութեանը ներկայ էին Իրանում Հ.Հ. լիազօր եւ արտակարգ դեսպան Արտաշէս Թումանեանը, դեսպանութեան աշխատակազմը, Իսլ. Խորհրդարանի Թեհրանի եւ հիւսիսային իրանահայութեան պատգագաւոր դոկտ. Կարէն Խանլարեանը, ազգային մարմինների, միութիւնների եւ կազմակերպութիւնների ներկայացուցիչներ, հոգեւոր հայրեր և հոծ թւով բազմութիւն:

Սրբազան Հայրն օրւայ առիթով արտայայտւելով ասաց «Այսօր աղօթեցինք, խնդրելով մեր նահատակների բարեխօսութիւնը մեզ համար, որպէսզի բարեխօս լինեն առ Աստւած, խնդրեցինք Աստծուց, որ մեր նահատակների գաղափարական աշխարհը՝ հաւատքը, յոյսը և սէրը, ծաղկի մեզանից իւրաքանչիւրի հոգում»:

Առաջնորդ Սրբազանը շարունակելով ասաց՝ «Աղօթեցինք, որպէսզի իրենք վերևից օրհնեն մեզ, սովորեցնեն մեզ մեր հաւատքի մէջ, մեր կամքի, դիմադրականութեան և պահանջատիրական պայքարի մէջ, որպէսզի կարողանանք մի օր մենք նրանց տեղը, իրենց հայրենի հողի վրայ նրանց փառաբանենք և նրանց երկիրն ու հողը շենացնենք և ծաղկեցնենք»:

Վերջում Սրբազան Հայրը փառաբանեց նահատակներին ասելով՝ «Փառք մեր նահատակներին. Փառք նաև նահատակների շնչով ապրող մեր ժողովրդին և հետևաբար մեր ժառանգած հայրենիքին, հերոսական Արցախին ու մեր ժողովրդի ֆիզիկական գոյութիւնը պահպանող, մեր սահմանները ամուր պահող, անյաղթահարելի հայոց բանակին»:

Կրօնական արարողութեանը յաջորդեց ծաղիկների մատուցում նահատակների յուշարձանի մօտ:  Ծաղկեմատոյցի արարողակարգի աւարտին յատուկ խօսքով ելոյթ ունեցաւ առաջնորդ սրբազան հայրը, որը կարևորութեամբ շեշտեց մեր պահանջատիրական պայքարի յարատևութիւնը և ապա մեծապէս գնահատեց ներկայ բազմութիւնը իր հաւատարմութեան և յանձնառութեան համար:

Սրբազան հօր ոգևորիչ խօսքից յետոյ գործադրւեց գեղարւեստական ծրագիր երիտասարդների միջոցով:

{gallery}201604/2016042602{/gallery}