Թեհրանի հայոց թեմի առաջնորդ Տ. Սեպուհ արք. Սարգսեանն իր զօրակցութիւնն է յայտնել հալէպահայութեանը:
Երկուշաբթի, հոկտեմբերի 17-ին, Սրբազան Հայրը հեռախօսազրոյց է ունեցել Հալէպի «Գանձասար» շաբաթաթերթի գլխաւոր խմբագիր Զարմիկ Պօղիկեանի հետ եւ իր զօրակցութիւնն է յայտնել սիրիահայութեանն ընդհանրապէս, եւ հալէպահայութեանը՝ յատկապէս:
Հեռախօսազրոյցի ընթացքում, Սրբազան Հայրը տեղեկացել է համայնքի, պատասխանատուների, ժողովրդին ծառայող եւ բազմաթիւ դժւարութիւնների դէմ պայքարող տղաների վիճակի մասին՝ շեշտելով, որ անձամբ ինքը եւ իրանահայ համայնքի բոլոր անդամներն իրենց աղօթքներում մշտապէս յիշում են սիրիահայ իրենց քոյրերին եւ եղբայրներին ու զօրակցում են նրանց:
Խրախուսելով հալէպահայութեանը՝ Սրբազան Հայրը բարձր է գնահատել Բերիոյ հայոց թեմի առաջնորդ Տ. Շահան արք. Սարգսեանի, պատկան մարմինների, ազգային իշխանութեան եւ հայկական թաղամասերի պաշտպանութեան ծանր պատասխանատւութիւնը ստանձնած հայ տղաների անձնազոհութիւնն ու նւիրւածութիւնը, եւ խաղաղութիւն է մաղթել Սիրիայի Արաբական Հանրապետութեանը: