«ԱԼԻՔ» - Երկխօսութիւնը գոյանում է այն ժամանակ, երբ կողմերը իրար չհասկանալու կողմն են բացայայտում: Այսօրինակ մեկնաբանութեամբ էր, որ երեքշաբթի, յունւարի 19-ին, Հ. Մ. «Սիփան» միութեան նախաձեռնած դասախօսական երեկոյին Սրբազան Հայրը ելոյթ ունենալով, խօսեց կրօնների միջեւ իր հարիւրամեակների պատմութեամբ երկխօսութեան շարունակականութեան, ինչպէս նաեւ միմեանց դաւանանքի կապակցութեամբ գիտակցութեան եւ տեղեկացւած լինելու կարեւորութեան շուրջ:
Տ. Սեպուհ արք. Սարգսեանը ներկայացնելով իր սեփական գործունէութեան փորձառութիւնից հատւածներ, լսարանի ուշադրութիւնը հրաւիրեց երկխօսութեան միջոցով փոխըմբռնման հասնելու անհրաժեշտութեանը: Նոյն այս գլխի տակ էր, որ լսարանի կողմից բարձրացւած այն հարցին, թէ՝ երկրում երբեմն կրօնական միջոցառումների ընթացքում ականատեսն ենք լինում մեր՝ հայ քրիստոնեայի հաւատքն ու զգայնութիւնները անտեսող քարոզչութեանը, որին թեմիս առաջնորդը պատասխանելով նշեց, որ նման դրւագների արձանագրման դէպքում չի ուշացել մեր պաշտօնական արձագանգն ու ներկայացւած բողոքագիրը: Նա օրինակներ նշելուց յետոյ անդրադարձաւ նաեւ այն խնդրին, որտեղ երբեմն այդ քարոզչութեան կենտրոնում են յայտնւում հայկական անունների անմիջական մասնակցութեան դէպքեր: «Եթէ իւրաքանչիւր հայ իր ազգային-կրօնական գիտակցութեան սահմաններն ընդլայնի, ապա այդօրինակ ոտնձգութեան դէպքերը նոյնպէս կը նւազեն»,- յատուկ կարեւորութեամբ նշեց Սրբազան Հայրը, միաժամանակ ցաւ յայտնելով, որ համայնքը նոյնպէս պիտի գիտակցի իր որդեգրած մօտեցումները եւ զգուշանալ սեփական սխալը համայնքի վրայ բարդելու խնդրից:
