ԱՅՑԵԼՈՒԹԻՒՆ ԼԻԲԱՆԱՆՈՒՄ ԻՐԱՆԻ ԻՍԼԱՄԱԿԱՆ ՀԱՆՐԱՊԵՏՈՒԹԵԱՆ ԴԵՍՊԱՆՈՒԹԻՒՆ

Մեծի Տանն Կիլիկիոյ Կաթողիկոսութեան Ազգային Ընդհանուր Ժողովին մասնակցելու նպատակով Լիբանան ժամանած Թեհրանի, Սպահանի եւ Ատրպատականի պատգամաւորները՝ երեք թեմերի առաջնորդներ՝ գերշ. Տ. Սեպուհ Արք. Սարգսեանի, գերշ. Տ. Սիփան Եպս. Քէչէճեանի եւ գերշ. Տ. Գրիգոր Արք. Չիֆթճեանի գլխաւորութեամբ Լիբանանում Իրանի Իսլամական Հանրապետութեան Դեսպանութիւն կատարած այցի ընթացքում հանդիպում ունեցան Լիբանանում Իրանի Դեսպանին:

Պրն. Դեսպանը ջերմօրէն ընդունեց պատւիրակութեան անդամներին եւ իր ուրախութիւնը յայտնեց այս հանդիպման համար:

Սեպուհ Ս. Արք. Սարգսեանը յանուն պատւիրակութեան իր շնորհակալութիւնը յայտնեց ջերմ ընդունելութեան կապակցութեամբ: Սրբազան Հայրը կարեւորութեամբ անդրադարձաւ հայ համայնքի վաղեմի ներկայութեանը եւ իրանահայերի ունեցած առանցքային դերակատարութեանը Իրանի կեանքի տարբեր ոլորտներում: Նա անդրադառնալով Իրանում տարբեր ազգութիւնների եւ կրօնների հետեւորդների խաղաղ գոյակցութեան նշեց, որ իրանահայութիւնը դարեր շարունակ իր միւս հայրենակիցների կողքին վարել է խաղաղ ու համերաշխ կեանք՝ ունենալով իր իրաւունքները:

Հանդիպման աւարտին պրն. Դեսպանը կրկին անգամ գոհունակութիւն յայտնեց այցելութեան կապակցութեամբ եւ յաջողութիւն մաղթեց Անթիլիասում տեղի ունեցող Ազգային Ընդհանուր Ժողովին եւ այնուհետ ճաշով պատւեց պատւիրակութեան անդամներին:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ