Ամանորեայ եւ Ս. Ծննդեան տօների առիթով, երեքշաբթի, թւականիս յունւարի 3-ին, Թեհրանի Կրթադաստիարակչութեան 6-րդ շրջանի նորանշանակ տնօրէն դոկտ. Համիդ Զիափուրը, տարր. օղակի Ուսումնական հարցերով տեղակալ՝ տկն. Սամադին, Դաստիրակչական հարցերով տեղակալ՝ տկն. Ֆաքուրին եւ Հանրային կապի պատասխանատու՝ տկն. Մոբինին այցելեցին Ազգ. Առաջնորդարան եւ հանդիպում ունեցան Թեմիս Առաջնորդ գերշ. Տ. Սեպուհ Ս. Արք. Սարգսեանի հետ:

Սոյն հանդիպման ներկայ էին նաեւ Թեմական խորհրդի ներկայացուցիչներ՝ Հայրիկ Աղանեանը եւ Անի Միրզախանեանը, Կրթական խորհրդի ատենապետ Ալֆրէդ Կարապետեանը, «Արաքս» դպրոցի տեսչուհի Անի Մանուկեանը եւ Գոհար դպրոցի տեսուչ Վահէ Բաբայեանը:

Սրբազան Հայրը հիւրերին սիրով ողջունելիս գեղեցիկ աւանդոյթ համարեց միմեանց հանդիպելը, տօները շնորհաւորելն ու բարին մաղթելը՝ այն երեւոյթը, որը մարդկանց ուրախացնում է եւ գոհացնում: Սրբազան Հայրը յայտնեց.-«Դրանք կարեւոր կէտերն են մանաւանդ, որ մենք պատասխանատու ենք նոր սերունդի դաստիարակութեան նկատմամբ»: Նա յաւելեց,.-«Նոր սերունդի դաստիարակութիւնը մեզանից իւրաքանչիւրի համար նւիրական եւ սուրբ պարտականութիւն է, հետեւաբար Ձեր եւ մեր գործը համատեղ կերպով այս նւիրական աշխատանքն է»:

Սրբազան Հայրը շնորհաւորեց դոկտ. Զիափուրին իր ստանձնած նոր պաշտօնի առիթով եւ յայտնեց,.-«Երբ պատասխանատու ենք նոր սերունդի դաստիարակութեանը դա միայն գիտութեամբ չէ, որովհետեւ դրան կարելի է հասնել ամէն կերպ, կարեւորը մարդու նկարագիրն է եւ մարդու բարոյական ըմբռնումը, որից սէր է ճառագայթելու»: Սրբազան Հայրն իր խօսքը շարունակելով յայտնեց,.-«Նոր սերունդի դաստիարակութեան նւիրական գործի մէջ մեծ եւ դժւարին պարտականութիւն ունի կրթադաստիարակչական տնօրէնութիւնը, հետեւաբար դաստիարակութեան նւիրւած անձը իր հոգին եւ շունչը պէտք է դնի այս նւիրական աշխատանքում»: Նա յաւելեց.-«Ես հաւատացած եմ, որ դուք Ձեր առաքելութեան մէջ լաւագոյնը պիտի անէք Ձեր շունչը եւ հոգին դնելով Ձեր գործում», որի համար յաջողութիւն մաղթեց դոկտ. Զիափուրին եւ նրան ընկերակցող պատւիրակութեանը:

Պրն. Հայրիկ Աղանեանը նաեւ Թեմական խորհրդի անունից ողջոյնելով հիւրերին շնորհակալութիւն յայտնեց այցելութեան եւ ցուցաբերած ուշադրութեան համար:

Դոկտ. Համիդ Զիափուրը նաեւ իր հերթին շնորհաւորանքի խօսքն ուղղելով իր արտայայտութիւնների ընթացքում անդրադարձաւ Իրանում կրօնական եւ էթնիկ փոքրամասնութիւնների բազմազանութեանն ու հազարամեայ խաղաղ գոյակցութիւնը եւ ազգային միասնականութիւնը համարեց Իրանի ազգային ինքնութեան իւրայատկութիւնը: Նա յայտնեց, որ բոլորիս առաքելութիւնն է կողք կողքի աշխատել եւ նպաստել երկրի առաջընթացին ու զարգացմանը, որի արդիւնաւորման ամենակարեւոր գործօնը Կրթադաստիարակչական համակարգն է ու դպրոցները, որոնք նաեւ դիտարկւել են որպէս յանցագործութեան նւազեցման եւ երկրում անվտանգութեան հաստատման կարեւոր գործօններ։ Դոկտ. Զիափուրն անդադառնալով հայոց դպրոցներին յայտնեց, որ իր հնարաւորութիւնների սահմաններում ոչ մի ջանք չի խնայելու լաւ ծառայութիւն մատուցելու դրանց բարգաւաճման համար:
Կրթական խորհրդի ատենապետ Ալֆրէդ Կարապետեանը նաեւ իր հերթին շնորհակալութիւնը յայտնեց Թեհրանի Կրթադաստիարակչութեան 3-րդ, 6-րդ եւ 8-րդ շրջանների կողմից հայոց դպրոցների նկատմամբ ունեցած ուշադրութեան եւ դրական մօտեցման կապակցութեամբ, որոնք յուսադրող են եւ ցուցաբերւում են առկայ որոշ խնդիրների լուծման համար:
Հանդիպման աւարտին Սրբազան Հայրը մէկ անգամ եւս շնորհաւորելով դոկտ. Զիափուրին, օրհնաբեր ու արդիւնաշատ ծառայութիւն մաղթեց իրեն եւ գործակիցներին:

Սոյն հանդիպումից յետոյ դոկտ. Համիդ Զիափուրն հանդիպում ունեցաւ Իսլ. Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի հետ ապա այցելեց Ս. Սարգիս եկեղեցի, որտեղ Հանրային կապի հոգեւոր հարցերի խորհրդատու Արժ․ Տ․ Գրիգորիս քհնյ. Ներսէսեանը հակիրճ բացատրութիւններ ներկայացրեց Թեհրանի եկեղեցիների եւ եկեղեցական կեանքի մասին:

Ազգային Առաջնորդարանի Հանրային կապ

{gallery}202301/202301403{/gallery}