ՍԱՀՄԱՆԱԴՐԱԿԱՆ ՕՐԷՆՔՈՎ ՀԱՍՏԱՏԱԳՐՒԱԾ ԿՐՕՆՆԵՐԻ ԵՒ ՀԱՄԱՅՆՔՆԵՐԻ ՀԱՆԴԻՊՈՒՄԸ՝ ՀԱՆՐ. ՆԱԽԱԳԱՀ ԱՅԱԹ. ՍԷՅԷԴ ԷԲՐԱՀԻՄ ՌԷՅԻՍԻԻ ՀԵՏ

Իսլամական յեղափոխութեան յաղթանակի 44-րդ տարեդարձի առիթով, երկուշաբթի փետրւարի 6-ի երեկոյեան, հանդիպում էր կազմակերպւել հանր. նախագահ Էբրահիմ Ռէյիսիի, Իսլ. մշակոյթի եւ առաջնորդութեան նախարար Մոհամմադ Մեհդի Էսմայիլիի, պետական պաշտօնատարների եւ երկրում կրօնական փոքրամասնութիւնների հոգեւոր առաջնորդների ու աշխարհիկ ներկայացուցիչների միջեւ:

Հանդիպմանը ելոյթներով հանդէս եկան Իսլ. մշակոյթի եւ առաջնորդութեան նախարարը, էթնիկ խմբերի եւ կրօնական փոքրամասնութիւնների հարցով նախագահի տեղակալ Մամոստա Աբդօլսալամը եւ կրօնական փոքրամասնութիւնների հոգեւոր առաջնորդները, որոնց հրաւիրում էր արտայայտւելու օրւայ հաղորդավար Արտոյտ Զոհրաբեանը:

Թեհրանի հայոց թեմի առաջնորդ Տ. Սեպուհ արք. Սարգսեանը իր ելոյթում շնորհաւորելով Իսլ. յեղափոխութեան յաղթանակի 44-րդ տարեդարձը, ընդգծում էր. «Իրանի Իսլամական յեղափոխութեան մեծագոյն իրագործումներից Իրանի ժողովրդի միասնականութեան պահպանումը եղաւ։ Այս իրողութեան գեղեցկագոյն փաստը Յեղափոխութեան եւ ութամեայ պատերազմի հէնց առաջին օրից Իրանի ողջ ժողովուրդը իր բոլոր հատւածներով, մէկ մարդու պէս, ոտքի կանգնեց ու արար աշխարհին ցոյց տւեց իրանցու հաւատաւոր կապւածութիւնն ու յանձնառութիւնը իր հայրենիքի պաշտպանութեան սրբազան գործում»։ Իր խօսքում Սրբազան Հայրը յայտնել է. «Մեզ համար մեծ ուրախութիւն է, երբ լսում ենք Յեղափոխութեան առաջնորդի եւ ղեկավարութեան կողմից զօրակցութեան կոչեր իր հայրենի հողի վրայ տառապող եւ այս օրերին յատկապէս սովամահութեան ենթակայ արցախցի տառապահար ժողովրդին, իբրեւ արդիւնք՝ Ադրբեջանի կողմից պարտադրեալ շրջափակման»։

Օրւայ ելոյթների եզրափակիչ խօսքով հանդէս եկաւ նախագահ այաթ. Ռէյիսին, յայտնելով. «Այսօր առաւել քան երբեւէ կարիքն ունենք միասնականութեան»: Նախագահը նշեց. «Այս բարեբաստիկ օրերը մեզ բոլորիս յիշեցնում են տարբեր բնագաւառներում Իսլ. Իրանի յաղթանակները, խիզախութիւնները եւ դիմակայութիւնները»:

Միջոցառմանը ներկայ էին՝ Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, իրանահայ երեք թեմերի եւ յարանւանութիւնների հոգեւոր առաջնորդները, ազգային իշխանութիւնների, «ԱԼԻՔ» հաստատութեան, միութիւնների, գիտական, հասարակական ու մտաւորական խաւի, նահատակների ընտանիքների ներկայացուցիչները եւ քահանայ հայրեր:

Սրբազան Հօր ամբողջական ուղերձը ներկայացնում ենք ստորեւ՝

Նորին Վսեմութիւն այաթ. Սէյէդ Իբրահիմ Ռէյիսի
Նախագահ Իրանի Իսլամական Հանրապետութեան
Մեծարգոյ պրն. նախարար, պետական յարգարժան այրեր, հանգամանաւոր հիւրեր, տիկնայք եւ պարոնայք եւ սիրելի հայրենակիցներ

Թոյլ տւէք առաջին հերթին ողջունել ձեզ բոլորդ այս անզուգական առիթի եւ կազմակերպւած սիրոյ այս սեղանի առիթով ու շնորհաւորել ձեզ պրն. նախագահ եւ ողջ Իրանի ժողովուրդը 22 Բահմանի յաղթապանծ տօնի առիթով եւ աղօթել միանգամայն, որ Աստւած անսասան պահի Իրանն ու իրանցին։
Իրանի ազնիւ ու մեծ ժողովուրդը այսօր հպարտութեամբ, երախտագիտութեան, երջանկութեան իւրայատուկ զգացումով ու գոհունակութեամբ ոգեկոչում է տարեդարձը իր Յեղափոխութեան, որ իր էութեամբ եղաշրջեց Իրանի ժողովրդի կեանքը, աւելին ամբողջ աշխարհը ողողեց յեղափոխութեան շունչով ու ոգիով։
Իրանի Իսլամական Յեղափոխութեան մեծագոյն իրագործումներից Իրանի ժողովրդի միասնականութեան պահպանումը եղաւ։ Իսլամը իր շիի եւ սիւննի հատւածների, քրիստոնեան իր բոլոր յարանւանութիւններով, զրադաշտականն ու հրեան, մի խօսքով բոլոր փոքրամասնութիւնները երկրի Իսլամական խորհրդարանի սահմանադրութեամբ, առաջին անգամը լինելով, պետական պաշտօնական հովանաւորութեամբ իրենք իրենց ազատ քաղաքացիներ զգացին։ Այս իրողութեան գեղեցկագոյն փաստը Յեղափոխութեան եւ ութամեայ պատերազմի հէնց առաջին օրից Իրանի ողջ ժողովուրդը իր բոլոր հատւածներով, մէկ մարդու պէս, ոտքի կանգնեց ու արար աշխարհին ցոյց տւեց իրանցու հաւատաւոր կապւածութիւնն ու յանձնառութիւնը իր հայրենիքի պաշտպանութեան սրբազան գործում։
Հանգուցեալ Իմամ Խումէյնու ժողովրդանւէր Յեղափոխութեան առաջնորդները եղան հովանաւորներն ու պաշտպանները իրաւազրկւած ժողովուրդների, որոնցից առաջինը պաղեստինցի տառապեալ ժողովուրդն է, որ ամէն օր մահու եւ կենաց պայքար է մղում իր իրաւունքների ձեռքբերման համար։ Մեզ համար մեծ ուրախութիւն է երբ լսում ենք Յեղափոխութեան առաջնորդի եւ ղեկավարութեան բերնից զօրակցութեան կոչեր իր հայրենի հողի վրայ տառապող եւ այս օրերին յատկապէս սովամահութեան ենթակայ Արցախցի տառապահար ժողովրդին, իբրեւ արդիւնք Ադրբէջանի կողմից պարտադրեալ շրջափակումին։
Խաղաղութիւն եւ յաւիտենական հանգիստ Իրանի Իսլամական Յեղափոխութեան ռահվիրա հանգուցեալ Իմամ Խումէյնու հոգուն։
Յարգանք ու պատիւ Իսլամական յեղափոխութիւնը պահող եւ առաջնորդող այաթ. Ալի Խամենէյիին, իր բոլոր գործակիցներին, ինչպէս նաեւ վսեմաշուք նախագահին, իր կառավարութեան եւ իրանցի ողջ ժողովրդին։
Խոնարհւում ենք յիշատակի առջեւ յանուն Յեղափոխութեան եւ Իրանի ամբողջականութեան պահպանման համար նահատակւած հազարաւոր զինւորների եւ փառք ու պատիւ յանուն Յեղափոխութեան, իրենց արեամբ Իրանի հողը սրբագործող անմահանուն նահատակներին եւ օրհնութիւն Իրանի ողջ ժողովրդին։
Խաղաղութիւն եւ անսասանութիւն իրանեան մեր սիրելի հայրենակիցներին։

ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ
6 փետրւար 2023թ.
Թեհրան

Ազգային Առաջնորդարանի Հանրային կապ