Շաբաթ, 8 ապրիլ 2023 թւականին, Թեհրանի բոլոր եկեղեցիներում մատուցւեց ճրագալոյցի Ս. Պատարագ, որին յաջորդեց մեր Տիրոջ Յիսուս Քրիստոսի Հրաշափառ Յարութեան տօնը:
Ս. Գրիգոր Լուսաւորիչ եկեղեցում Ս. Պատարագ մատուցեց եւ յաւուր պատշաճի քարոզեց թեմակալ առաջնորդ գերշ. Տ. Սեպուհ Ս. Արք. Սարգսեանը իսկ Գերպ. Տ. Վաղինակ Ծ. Վրդ. Մելոյեանը՝ Սրբ. Վարդանանց եկեղեցում եւ Սրբ. Թարգմանչաց եկեղեցում՝ Անթիլիասից քաղաքս հիւրաբար գտնւող Հոգշ. Տ. Պարոյր Վրդ. Շէրնէզեանը:
Առաջնորդ Սրբազան Հայրն իր քարոզի մէջ անդրադարձաւ այն ճշմարտութեան, որ Քրիստոսն Իր յարութեամբ մեզ լուսաւոր կեանք շնորհեց, կեանք՝ որ բոլորին խաւարից դէպի լոյս առաջնորդեց։ Նա իր խօսքի մի բաժնում ակնարկեց աշխարհի ամենաանզուգական դէպքին՝ Քրիստոսի յարութեան զօրութեան, որը Նրա հետեւորդների կեանքի մշտնջենական ուղեկիցը հանդիսացաւ։
Սրբազան Հայրն անդրադառնալով օրւայ խորհրդին ասաց, որ Քրիստոսի՝ գալուստը, խաչելութիւնը եւ յարութիւնը հետեւանքն է Նրա սիրոյն, քանի որ Յովհաննէս Աւետարանիչը ասում է.-«Աստւած այնքան սիրեց աշխարհը, որ նոյնիսկ իր միածին Որդուն ուղարկեց, որ ով նրան հաւատայ, փրկւի ու յաւիտենական կեանք ունենայ»։ Սրբազան Հայրը յաւելեց, Քրիստոսի զոհագործութիւնը հետեւանքն է մարդկութան նախածնողների Ադամի ու Եւայի մեղանչման, որը մարդուն առաջնորդեց կորստի եւ մահւան․ ըստ առաքելական խօսքի մեղքն աշխարհ եկաւ եւ նաեւ մէկ մարդու պատճառով Աստծու շնորհը տրւեց մարդկութեան։
Սրբազան Հայրը ակնարկելով Տիրոջ խաչելութեան ժամանակ կատարւած իրադարձութիւններին ասաց, որ տաճարի վարագոյրի վերից վար պատռւելը, Աստծու եւ մարդու միջեւ մեղքի պատճառով առաջացած տարածութեան վերցնել է նշանակում։ Նա յաւելեց մարդկութեան մեղքը Քրիստոսի վրայ գալով, այսուհետ մարդը կարող է ուղղակիօրէն յարաբերութեան մէջ մտնի Աստծու հետ, եւ սա Քրիստոնէութեան վարդապետութեան մեծագոյն իմաստներից մէկն է։ Առաջնորդ Սրբազան Հայրը նաեւ ասաց, որ Քրիստոսի յարութիւնը այն լոյսն էր, որ փարատեց անգիտութեան խաւարը եւ մարդկութեան նոր կեանք շնորհեց։
Սրբազան Հայրը իր խօսքի մի այլ բաժնում ասաց, որ այսօր ամէն տեղ ականատես ենք լինում չար պատահարների, քանի որ Յարուցեան Փրկչի լոյսը չի ներթափանցել իւրաքանչիւրի հոգում եւ դրա համար կարծես աշխարհը կործանման եզրին է հասել։ Նա յաւելեց, որ մեր ժողովուրդն էլ տարբեր տառապանքների ու հալածանքների միջից անցաւ, բայց երբեք իր հաւատքը չտկարացրեց, իր յոյսը մնաց տոկուն եւ իր տեսիլքը դէպի ապագան, իր նայւածքը դէպի յարուցեալ փրկիչը մնաց միշտ վառ։ Այսօր էլ մենք որպէս ժողովուրդ երեւի մեր պատմութեան ամենաճակատագրական եւ անորոշ պահերն ենք ապրում, թէ հայրենքում, թէ Արցախում եւ թէ սփիւռքում։ Որեւէ ժամանակից աւելի, մենք ազգովի կարիք ունենք դարձ կատարենք դէպի Աստւած, որից հեռացել ենք. կարիք ունենք աստւածային ճշմարտութեան ու նոր մեկնութեամբ մեր կեանքը ապրելու եւ ըստ այնմ մենք մեզ իմաստաւորելու։ Մենք որպէս ազգ եւ ժողովուրդ բոլոր ժամանակներից աւելի, կարիք ունենք աստւածային լոյսով լուսաւորւելու, այն լոյսը, որ Փրկչի գերեզմանը կենսատու աղբիւրի վերածեց։
Սրբազան Հայրը նաեւ ակնարկեց այն ճշմարտութեան որ կուսածին Տէրը դրւեց նաեւ կոյս գերեզմանի մէջ։ Ապա յաւելեց, որ Քրիստոսը իր մահւամբ յաղթեց մահւան եւ մեզ կեանք շնորհեց եւ մենք դարձանք նոր մարդ եւ նոր արարած ու այսօր երբ մենք խօսում ենք Կուսածին Տիրոջ եւ կոյս գերեզմանի մէջ դրւելու մասին, վերյիշում ենք նաեւ Աստւածամօրը, որի Աւետման տօնը յատուկ կերպով տօնեց մեր եկեղեցին եւ այդ մենք տօնում ենք նաեւ որպէս մեր քոյրերի եւ մայրերի տօն․ հետեւաբար Կուսածին Տէրը, Աստւածամարդ փրկիչը մեզ առաջնորդում է Իր կամքի համաձայն դէպի խաղաղութիւն։
Ազգային Առաջնորդարանի Հանրային կապ
https://tehranprelacy.com/9-content-hy/news-hy/4055-2023041702?tmpl=component&print=1#sigProIdbd4ddc86a6