Կիրակի, 16 ապրիլ 2023 թւականին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Ի.Ի.Հ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանին, ով եկել էր Քրիստոսի Ս. Յարութեան տօնի առիթով, իր շնորհաւորանքները եւ բարեմաղթանքները փոխանցելու Սրբազանին:

Սրբազան Հայրը ջերմօրէն ողջունեց եւ գնահատեց Պատգամաւորի այցը եւ փոխադարձ շնորհաւորանքները փոխանցեց պրն. Շահվերդեանին եւ իր ընտանիքին:

Հանդիպման ընթացքում յատուկ անդրադարձ կատարւեց վերջին շաբաթւայ ընթացքում Անզալի շրջանի Սուրբ Աստւածածին եկեղեցու շրջափակում գտնւող թեմապատկան շէնքում բռնկւած հրդեհի պատճառած վնասների փարատման եւ տնօրինման գործընթացին:

Սրբազան Հայրն իր գոհունակութիւնը յայտնեց պրն. Արա Շահվերդեանին, խնդրին անյապաղ եւ աչալրջօրէն հետեւելու համար:

Ազգային Առաջնորդարանի հանրային Կապ