Թեհրանի Հայոց Թեմի Թեմական Խորհրդի անունից, մեր զօրակցութիւնն ենք յայտնում Տաւուշի Հայոց Թեմի Բարեջան Առաջնորդ Տ. Բագրատ Ս. Արք. Գալստանեանին, ով վերջին երկու շաբաթներում ՀՀ Տաւուշի մարզում տեղի ունեցած իրադարձութիւնների ամբողջ ընթացքին, ոգի ի բռին կանգնած է Հայաստանի Հանրապետութեան տարածքային ամբողջականութեան պաշտպանման թիկունքում եւ առաջնորդելով «Տաւուշը յանուն հայրենիքի» ազգային ու հայրենապաշտպան մղումներով կեանքի կոչւած շարժմանը, դէմ յանդիման է կանգնում Հայաստանի սահմանային անվտանգութեանը հարւածող գործողութիւններին:

Արդարեւ այսօր հայ ժողովուրդը, որեւէ մէկ ժամանակից աւելի կոչւած է, միասիրտ եւ միակամ համախմբւելու եւ գործելու ի խնդիր Հայրենիքի ամբողջականութեան պահպանման:

Ուստի, Հայրենիքի համար ճակատագրական այս օրերին, մեր ձայնը միացնելով արիասիրտ հայորդիների արդար պահանջի ձայնին, դատապարտում ենք Հայաստանի Հանրապետութեան տարածքային ամբողջականութիւնը ու անվտանգութիւնը խաթարող եւ հայ ժողովրդի խաղաղ գոյութեան հանդէպ ծաւալւող գործողութիւնները եւ կրկին մեր զօրակցութիւնն ենք յայտնում պահանջատիրական շարժմանը եւ Տաւուշի Հայոց Թեմի քաջարի Առաջնորդ Տ. Բագրատ Ս. Արք. Գալստանեանին:

Թ.Հ.Թ. ԹԵՄԱԿԱՆ ԽՈՐՀՈՒՐԴ
07.05.2024