Ուրբաթ, 31 մայիս 2024 թւականին, Թեհրանի Ս. Սարգիս եկեղեցում, հովանաւութեամբ թեմիս առաջնորդ Գերշ. Տ. Սեպուհ արք. Սարգսեանի տեղի ունեցաւ յիշատակի արարողութիւն Ի. Իսլ. յեղափոխութեան հիմնադիր առաջնորդ հանգուցեալ Իմամ Խոմէյնիի մահւան 35-րդ տարելիցի առիթով:

Կրօնական արարողութեան պատարագիչն էր Արժ․ Տ․ Արիստակէս քհնյ. Շահմիրեանը: Քահանայ Հայրն իր քարոզի ընթացքում անդրադառնալով հանգուցեալ Իմամ Խոմէյնիի անհատականութեանը ընդգծեց որ Նա իր երկրում հոգեւոր կուրութիւն տեսնելով ընդվզեց եւ պայքարի դաշտ իջնելով, հաւատքի լոյսը սփռեց ամբողջ երկրում։

Արարողութեանը ներկայ էին՝ Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թ.Հ.Թ. Թեմական խորհրդի ատենապետ ճրտպ. Նորայր Արամեանը եւ ատենադպիր Հայրիկ Աղանեանը, հանգուցեալ Իմամ Խոմէյնիի մահւան 35-րդ տարելիցը նշող կենտրոնական շտաբի կրօնական փոքրամասնութիւններին յանձնախմբի պատասխանատու Մոհամմադ Ռեզա Մովահեդին, Իրան-Իրաք Պարտադրեալ Պատերազմի Հայ Նահատակների եւ Անձնուրացների Արժէքների Պահպանման յանձնախմբի ներկայացուցիչները եւ նկատառելի թւով հաւատացեալներ:

Յաւարտ կրօնական արարողութեան, ազգային առաջնորդարանի դահլիճում կազմակերպւել էր հանդիպում, որի ընթացքում Մոհամմադ Ռեզա Մովահեդին կարեւորութեամբ անդրադարձաւ Իրանի ժողովրդի միասնականութեանը եւ իր գնահատանքը յայտնեց իրանահայութեանը, ազգային իշխանութեանը եւ Սրբազան Հօրը, որ միշտ իրենց համագործակցութիւնն են ցուցաբերել:

Ազգային Առաջնորդարանի Հանրային կապ