Չորեքշաբթի, 19 յունիս 2024 թւականին, Թ.Հ.Թ. Կրթական խորհրդի նախաձեռնութեամբ կայացաւ հանդիպում 8-րդ կրթադաստիարակչական կենտրոնի պատասխանատուների հետ:

Հանդիպմանը մասնակցում էին 8-րդ կրթադաստիարակչական կենտրոնի տնօրէն՝ պրն. Ամերէն, միջնակարգ օղակի պատասխանատու'պրն. Հասան Բէյգին եւ տարրական օղակի պատասխանատու՝ տկն. Բանիջամալին, Կրթական խորհրդից՝ ատենապետ՝ Ալֆրէդ Կարապետեանը, փոխատենապետ' Կարինէ Բալըքճեանը եւ նոյն խորհրդի անդամ՝ Խաչատուր Խաչատրեանը։

Ելնելով այն հանգամանքից, որ Թեհրանի 8-րդ կրթադաստիարակչական կենտրոնի հայեցողութեան տակ են գտնւում հայկական մեծ թւով դպրոցներ, յաճախ անհրաժեշտութիւն է առաջանում հանդիպումներ ունենալ կենտրոնի ներկայացուցիչների հետ, քննարկելով եւ լուծումներ գտնելով տարբեր հարցերի շուրջ։ Սոյն հանդիպմանը հիմնականում քննարկւեցին' հայոց դպրոցներին աշխատուժի տրամադրման եւ «Նայիրի-Սողոմոնեան» դպրոցին վերաբերող հարցեր։

Ատենապետ՝ Կարապետեանը ընդգծել է, որ շատ կարեւոր է, հայկական դպրոցներում, հանգստի կոչւող տեսուչների փոխարէն, նոր տեսուչների նշանակումը կատարւի բծախնդրօրէն եւ որոշ նկատառումներով, անհրաժեշտ է նոր նշանակւող տնօրէնները ծանօթ լինեն հայկական մշակոյթին, կրօնին եւ ազգային ու դրւածքին։

«Նայիրի-Սողոմոնեան» դպրոցը աւել աշխուժացնելու նպատակով՝ յառաջիկայում դպրոցում կը կայանայ հանդիպում՝ 8-րդ կրթադաստիարակչական կենտրոնի տնօրէն՝ պրն. Ամերէի, միջնակարգ օղակի պատասխանատու՝ պրն. Հասան Բէյգիի եւ Կրթական խորհրդի ներկայացուցիչների միջեւ, որտեղ աւելի խորքային եւ մանրամասնօրէն կը քննարկւեն դպրոցում տարբեր ծրագրեր կազմակերպելու եւ իրականացնելու հարցեր։

Հանդիպումն անցաւ մտերմիկ մթնոլորտում:

Թ.Հ.Թ. ԿՐԹԱԿԱՆ ԽՈՐՀՈՒՐԴ