Գիտելիքը, հազարամեակներ շարունակ լինելով մեր ժողովրդի ամենամեծ հարստութիւնը, իսկ գիտելիքի ձեռքբերման ձգտումը գերագոյն արժէքներից մէկը, պարտաւորեցնում է մեզ սովորել եւ սովորել, ձգտել կուտակել հնարաւորինս շատ գիտելիքներ:

Այս տարի սեպտեմբերի 22-ին, մեկնարկեց 2024-2025 ուսումնական տարին Թեհրանի բոլոր հայկական դպրոցներում եւ մանկապարտէզներում:

Վերամուտի առիթով հայկական դպրոցներ են այցելել Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր՝ պրն. Արա Շահվերդեանը, Թ.Հ.Թ. Թեմական եւ Կրթական խորհուրդների ներկայացուցիչները եւ քահանահայրեր, որոնք օրւայ խորհրդին համահունչ շնորհաւորանքներ, օրհնութեան խօսքեր եւ Սրբազան Հօր ուղերձը յղեցին աշակերտութեանն ու դպրոցների պաշտօնեաներին:

Ուսումնական տարւայ սկիզբն աւետող այս օրն առաւել յիշարժան է մեր առաջին դասարանցիների համար, որոնք իրենց առաջին, յստակ քայլերն են անելու գիտութեան հսկայ ովկիանոսում: