Ամանորի եւ Ս. Ծննդեան տօների առիթով, երկուշաբթի՝ 30 դեկտեմբեր 2024 թւականին, Ազգ. Առաջնորդարան այցելեցին Իրանի Հանր. Նախագահի կանանց եւ ընտանիքի հարցերով տեղակալ՝ դոկտ. Զահրա Բեհրուզ Ազարը (معاون رئیس ‌جمهور در امور زنان و خانواده), Սրբազան Պաշտպանութեան արժէքների պահպանութեան եւ հրատարակութեան հիմնադրամի նախագահի տեղակալ՝ Գեներալ Մայոր Նաբի Սոհրաբին (امیر سرتیپ نبی سهرابی جانشین رئیس بنیاد حفظ آثار و نشر ارزش های دفاع مقدس), Երկրի կանանց հասարակութեան Բասիջականների նախագահ՝ Մինա Բիաբանին (رئیس بسیج جامعۀ زنان کشور) եւ նրանց ընկերակցող պատւիրակութիւնը:

Ազգ. Առաջնորդարանի դահլիճում պատւիրակութեանը դիմաւորեցին Հոգշ. Տ. Առաքել Աբղ. Գատեհճեանը, Թեմական խորհրդի ատենապետ Վարուժ Յովհաննիսեանը, փոխ-ատենապետուհի Արմինէ Սէթխանեանը, նոյն խորհրդի անդամ՝ պրն. Ժորժ Հայրապետեանը, Տ. Սահակ քհնյ. Խոսրովեանը եւ ազգ. առաջնորդարանի դիւանապետ՝ Զօրիկ Կարապետեանը:

Հանդիպմանը նաեւ ներկայ էին՝ Իրան-Իրաք Պարտադրեալ Պատերազմի Հայ Նահատակների եւ Անձնուրացների Արժէքների Պահպանման յանձնախմբի ներկայացուցիչ՝ անձնուրաց Այւազ Խուդավերդեանը, նահատակներ՝ Զօրիկ Մուրադեանի, Վարդան Աղախանեանի, Ռազմիկ Խաչատրեանի մայրերը եւ նահատակներ՝ Անուշաւան Այւազեանի եւ Ռազմիկ Սահակեանի կանայք:

Հանդիպման սկզբին, տկն. Արմինէ Սէթխանեանը ողջունեց հիւրերի ներկայութիւնը եւ ուրախութիւն ու երախտագիութիւն յայտնեց կատարւած այցի կապակցութեամբ:

Առանձին ելոյթներով արտայայտւեցին եւ Ամանորի եւ Ս. Ծննդեան տօների առիթով շնորհաւորեցին դոկտ. Զահրա Բեհրուզ Ազարը, Մինա Բիաբանին եւ Ամիր Սարթիփ Նաբի Սոհրաբին, ով նաեւ փոխանցեց Սրբազան Պաշտպանութեան արժէքների պահպանութեան եւ հրատարակութեան հիմնադրամի նախագահի ողջոյնը եւ բարեմաղթանքները: Արտայայտութիւններում առանձնայատուկ անդրադարձ կատարւեց եւ արժեւորեց Իրան-Իրաք պարտադրեալ պատերազմում նահատակւած, գերեւարւած եւ վիրաւորւած հայ նահատակների եւ անձնուրացների սխրագործութիւնները՝ Իրանի տարածքային ամբողաջակնութեան պաշտպանութեան համար իսկ առաւել արժեւորւեցին նահատակների մայրերը, ովքեր իրենց ամենաթանկագինը նւիրեցին երկրի պաշտպանութեան համար:

Հոգշ. Տ. Առաքել աբղ. Գատեհճեանը, գերշ. Տ. Սեպուհ Արք. Սարգսեանի ողջոյնի խօսքերը փոխանցելով, շնորհակալութիւն յայտնեց հիւրերին՝ ներկայութեան ու շնորհաւորանքների համար: Նա իր արտայայտութիւններում նշեց, որ Իրանի հայ համայնքը, որպէս Իրանի հասարակութեան անբաժանելի մաս եւ որպէս Իրանի հողում խաղաղ համակեցութեամբ ապրող, օրինակելի է եղել եւ Իսլամական յեղափոխութեան առաջին իսկ օրերից եւ իր հաւատարմութիւնն է ցոյց տւել յեղափոխութեան եւ սեփական երկրին՝ Իրանին:

Հանդիպմանը գնահատագրեր եւ յուշանւէրներ յանձնւեցի նահատակների ընտանիքների ներկայացուցիչներին առ ի երախտագիտութիւն:

Հանդիպման աւարտին, հիւրերին նւիրւեց «Իրանի հայկական եկեղեցիներ» խորագրով՝ պարսկերէն եւ անգլերէն լեզւով հրատարակւած գիրքը:

Ազգային Առաջնորդարանի հանրային Կապ