Հրամանավ եւ օրհնութեամբ Թեհրանի հայոց թեմի բարեխնամ Առաջնորդ Գերշ․ Տ. Սեպուհ Ս. Արք. Սարգսեանի եւ կազմակերպութեամբ Թ.Հ.Թ. Քրիստոնէական դաստիարակութեան յանձնախմբի՝ թւականիս փետրւարի 5-ին, ազգային առաջնորդարանում, տեղի ունեցաւ կրօնի ուսուցիչների հանդիպում։

Հանդիպմանը ներկայ էին Թ.Հ.Թ. Կրթական խորհրդի կրօնի ուսուցիչների հետ կապ՝ Տկն. Այրինա Նորավեանը, Թ.Հ.Թ. Քրիստոնէական դաստիարակութեան բաժանմունքի պատասխանատու՝ Տկն. Շաքէ Եղիայեանը, յանձնախմբի ատենապետուհի` Անի Մանուկեանը եւ կրօնի բոլոր ուսուցիչ-ուհիները։

Ժողովը սկսւեց Տէրունական աղօթքով ու Զգործս ձեռաց մաղթանքով։ Աղօթքից յետոյ Քրիստոնէական դաստիարակութեան յանձնախմբի ատենապետուհին բարի գալուստ մաղթեց բոլորին եւ յայտարարեց ժողովը բացւած։ Բարի գալստի խօսքից յետոյ, խօսւեց կրօնի դասաւանդման եւ դասարանների խնդիրների մասին ու իւրաքանչիւր ուսուցիչ բացատրեց իր գործելաոճը եւ դասաւանդման մեթոդիկան։

Ուսուցիչների զեկոյցներից յետոյ տեղի ունեցաւ մտքերի փոխանակում եւ հարց ու պատասխան, որպէսզի բոլոր ուսուցիչները օգտագործելով միմեանց կարծիքները, կարողանան ներառել նորարարութիւններ, Կրօնի դասաւանդումը ու դասը աւելի դիւրամատչելի եւ հասկանալի դարձնելու մատաղ սերնդի համար։

Ժողովի աւարտին Կրթական խորհրդի ներկայացուցիչը հարկ եղած ցուցմունքները եւ բովանդակալից խորհուրդները փոխանցեց ուսուցիչներին:

Թ.Հ.Թ. ՔՐԻՍՏՈՆԷԱԿԱՆ ԴԱՍՏԻԱՐԱԿՈՒԹԵԱՆ ՅԱՆՁՆԱԽՈՒՄԲ