Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



Events Calendar

Կրօնական Տօն՝

Sunday, 25 September 2022

ՏՕՆ ՎԱՐԱԳԱՅ ՍՐԲՈՅ ԽԱՉԻ ԽԱՉՎԵՐԱՑԻ ԵՐՐՈՐԴ ԿԻՐԱԿԻՆ ՎԱՐԱԳԱՅ ՍՈՒՐԲ ԽԱՉԻ ՏՕՆՆ Է

ՏՕՆ ՎԱՐԱԳԱՅ ՍՐԲՈՅ ԽԱՉԻ
ԽԱՉՎԵՐԱՑԻ ԵՐՐՈՐԴ ԿԻՐԱԿԻՆ ՎԱՐԱԳԱՅ ՍՈՒՐԲ ԽԱՉԻ ՏՕՆՆ Է

Կլաւդիոս կայսեր կինը` Պատրոնիկէ թագուհին, ընդունելով Յակոբոս Տեառնեղբօր ձեռքից խաչափայտի Սուրբ մասունքը, այն Հռոմ է տանում: Որից յետոյ այդ Սուրբ մասունքը, սերունդից սերունդ ժառանգաբար փոխանցւելով, հասաւ Սուրբ Կոյս Հռիփսիմէին, ով Կլաւդիոս կայսեր եւ Պատրոնիկէ թագուհու սերնդից էր:

Սուրբ Կոյսն իր պարանոցից մշտապէս կախած էր պահում այդ սուրբ մասունքը, որի վրայ թափւել էր Տիրոջ Արիւնը: Նա քրիստոնեայ ծնողների զաւակ էր եւ կրօնաւորում էր Հռոմի Սուրբ Պօղոս հռչակաւոր վանքի կուսանոցում, որի մայրապետն էր Սուրբ Գայիանէն, ով շուրջ երեք հարիւր կոյսերի դաստիարակում էր Աստծու երկիւղով:
Այդ ժամանակներում էր, երբ Դիոկղէտիանոս կայսրը կամեցաւ իրեն կնութեան առնել Սուրբ Հռիփսիմէին, բայց նա` եօթանասուն կոյսերի հետ միասին, իրենց քահանաներով հանդերձ, փախաւ Եգիպտոս, ապա`այնտեղից Երուսաղէմ, որտեղ նրանք այցելեցին Քրիստոսի տնօրինական վայրերը եւ սուրբ Աստւածամօր գերեզմանի վրայ աղօթելիս հրաման ստացան գնալ Թադէոս առաքեալի վիճակը: Հնազանդւելով հրամանին` նրանք գնացին Եդեսիա, ուր գտնւում էր Փրկչի պատկերը: Նրանցից շատերը մնացին Եդեսիաում, իսկ միւսները շարունակեցին իրենց ճանապարհը դէպի Արարատի երկիր՝ Հայաստան: Իսկ ովքեր մնացին Եդեսիայում, հետագայում սպանւեցին Դիոկղետիանոսի հրամանով:
Սուրբ Գայիանէի խումբը, շրջելով Հայաստանի գաւառներում, Սուրբ մասունքի միջոցով ամենուր մեծամեծ նշաններ էր գործում: Նրանք մաքրում էին ախտացեալ ջրերը, հալածում դեւերին, բժշկում հիւանդներին: Սուրբ Գայիանէն եւ իր խումբը միորոշ ժամանակ հանգրւանեցին Հոգեաց վանքում, ուր գտնւում էր ամենօրհնեալ Սուրբ Կոյսի պատկերը: Յետոյ գնացին Վարագա լեռը եւ հաստատւեցին այնտեղ: Լեռանգագաթին, որը կոչւում է ՙԳալիլիա՚, ամփոփեցին սուրբ Նշանը, որպէս մեծ պարգեւ` թողնելով Հայաստան աշխարհին: Եւ դա իրենց կամքով չարեցին, այլ` Աստծու նախախնամութեամբ: Նրանցից ոմանք մնացին լեռնագագաթին` սպասաւորելու Սուրբ Նշանին, իսկ Սուրբ Գայիանէն եւ Սուրբ Հռիփսիմէն, երեք քահանաներով եւ քառասուն կոյսերով, Սուրբ Հոգու առաջնորդութեամբ գնացին Վաղարշապատ, որտեղ եւ նահատակւեցին: Իսկ նրանք, ովքեր մնացին Վարագա լեռան վրայ, եւ որոնցից երկուսը քահանաներ էին, քաջալերւելով Սուրբ Գրիգորի` Վիրապից ելնելուց յետոյ իրենց կատարած այցելութիւնից, այդտեղ եկեղեցի հաստատեցին, որը հետագայում տեղի խստաշունչ եղանակի պատճառով անբնակ մնաց:
Հայոց աշխարհում գիտէին, որ Վարագա լեռան վրայ է պահւած Սուրբ Նշանը, բայց մինչեւ իշխանաց իշխան մեծն Վարդպատրիկ Ռշտունու եւ Ներսէս Շինող կաթողիկոսի հայրապետութեան ժամանակները չէին կարողանում գտնել այն: 653 թ. Թոդիկ անունով մի կրօնաւոր, իր սրբասէր աշակերտի` Յովէլի հետ միասին գնում է ճգնելու Վարագա լեռան վրայ եւ հաստատւում այն վայրում, ուր բնակւել էին Սուրբ կոյսերը: Նրանց իղձն էր գտնել Սուրբ Խաչի մասունքը: Երկար ճգնութիւնից յետոյ աւելի է բորբոքւում նրանց սիրտը Քրիստոսի սիրով եւ Սուրբ Նշանի փափագով: Ճգնաւորներն էլ աւելի են խստացնում իրենց ճգնութիւնը եւ տասներկու օր շարունակւող անսւաղ ծոմապահութեամբ հայցում Տիրոջից` տեսնել իրենց փափագածը: Մարդասէրն Աստւած, ով կատարում է Իր երկիւղածների կամքը, լսում է նրանց եւ գիշերամիջին, երբ նրանք աղօթում էին, լեռան գագաթից, որտեղ պահւած էր Սուրբ Նշանը, ահաւոր ձայնով նրանց նշան է տալիս, ինչից զարմացած նրանք նայում են դէպի լեռանգագաթը եւ այնտեղ տեսնում պայծառ լոյս: Լոյսն իր չափով ու ձեւով այնպիսին էր, ինչպիսին այդ տեղ գտնւող մասունքը: Ճգնաւորները շարունակում են զարմացած նայել լոյսին, որն աստիճանաբար պայծառանում էր եւ լուսաւորում ամբողջ լեռը, առաւել քան արեգակի լոյսը, որով սքանչանալով փառավորում են Աստծուն: Ապա տեսնում են լոյսի տասներկու սիւներ, որոնք վեր էին խոյացել երկրից մինչեւ երկինք: Ամբողջ լեռը լցւում է անուշահոտութեամբ ու հրեշտակների օրհնութեան երգերով:
Մինչ կրօնաւորները վայելում էին այդ սքանչելիքը, որը տեւեց կէս գիշերից մինչեւ կէսօրւայ ժամը 12:00, Սուրբ մասունքն իր մասնատուփով հանդերձ ելնում է վէմից եւ լոյսերի մէջ վեր բարձրանալով ու ցոլարձակելով` գալիս ու մտնում է եկեղեցի եւ վերաբերւում Սուրբ Սեղանին` լոյս ճառագայթելով կէսօրւայ ժամը 12:00-ից մինչեւ ժամը 15:00: Մինչ ճգնաւորները զարմանքի մէջ էին, խաչանիշ լոյսից նրանց ձայն է հասնում, որն ասում է. ՙՔրիստոս հաճեց բնակւել Սուրբ Նշանի մէջ` Հայոց աշխարհի պահպանութեան եւ փրկութեան համար՚: Եւ նրանք առաջ գալով` մեծ ահով ու դողով տեսնում են Սուրբ Նշանը` Սուրբ Սեղանի վրայ լոյսով պարուրւած: Ապա այն վերցնելով իրենց ձեռքը` արտասւալից համբուրում են ու գոհանում Տիրոջից:

Այդ սքանչելի տեսիլքը ոչ միայն նրանց էր երեւում, այլեւ լեռան շրջակայքում բնակւող բոլոր մարդկանց, ովքեր ակներեւ տեսնում էին լոյսը, որը ծագեց Վարագա լեռան Գալիլիա կոչւող գագաթից: Տասներկու օր շարունակ լոյսի սիւները շրջապատում են լեռանգագաթը: Ժողովուրդն եպիսկոպոսներով ու քահանաներով հանդերձ բարձրանում է լեռը, որոնց հետ նաեւ Վարդ Իշխանն իր զօրքով, եւ հարցնում ճգնաւորներին տեսիլքի ու լուսեղէն սիւների մասին: Նրանք էլ կարգով պատմում են ամէն ինչ, մէկ առ մէկ, եւ ցոյց տալիս եկեղեցու Սեղանի վրայ բերւած Սուրբ Նշանը, որին ժողովուրդը երկրպագում էր եւ փառք տալիս Աստծուն: Իսկ անուշահոտութեան բուրումը դեռ երկար ժամանակ շարունակում էր բազմութեանը զմայլել, ովքեր էլ հիացած օրհնում էին ու փառաբանում Աստծուն՝ Սուրբ Խաչի երեւման համար:

Այս ամենից յետոյ Ներսէս Գետայեցի (Շինող) հայրապետը կարգ է սահմանում` ամէն տարի այդ օրը տօնել ՙՎարագա Սուրբ Խաչի տօնը` Քրիստոսի եւ Նրա Սուրբ Խաչի փառքի համար: Ապա տասներկու սիւներով եկեղեցիներ են կառուցում` տասներկու լուսեղէն սիւների երեւման տեղում, իսկ այնտեղ, ուր եկաւ եւ հանգեց Սուրբ Նշանը, ընդարձակելով նորոգում են եւ տեղում վանք հիմնում:

 
 

ՏՕՆԵՐ

Կրօնական Տօների Օրացոյց


Շաբաթ 29 Հոկտեմբերի 2022;
Տօն Յովհան Ոսկեբերանի

Շաբաթ 05 Նոյեմբերի 2022;
Տօն Սուրբ հրեշտակապետների Միքայէլի ու Գաբրիէլի եւ ամենայն երկնային զօրաց տօն

Շաբաթ 12 Նոյեմբերի 2022;
Տօն Անդրէաս եւ Փիլիպոս Առաքեալների

Կիրակի 20 Նոյեմբերի 2022;
Բարեկենդան Յիսնակի Պահոց

Երկուշաբթի 21 Նոյեմբերի 2022;
Տօն ընծայման Ս․Աստւածածնի երից ամաց ի տաճար։

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ