Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



ՀԱՆԴԻՍԱՒՈՐ Ս. ՊԱՏԱՐԱԳ «Ս. ԱՍՏՒԱԾԱԾԻՆ ԵՐԻՑ ԱՄԱՑ Ի ՏԱՃԱՐՆ ԸՆԾԱՅՄԱՆ» ԵՒ ՀԱՄԱՆՈՒՆ ԵԿԵՂԵՑՒՈՅ ԱՆՒԱՆԱԿՈՉՈՒԹԵԱՆ ՏՕՆԻ ԱՌԻԹՈՎ

Նոյեմբերի 21-ը տօնն է «Ընծայման Ս. Աստւածածնի Երից ամաց ի տաճարն» եւ տօնն է նաեւ համանուն եկեղեցւոյ անւանակոչութեան:
Այդ առիթով կիրակի թւականիս նոյեմբերի 21-ի առաւօտեան, Ս. Աստւածածին եկեղեցում նախագահութեամբ Թեմիս Առաջնորդ գերշ. Տ. Սեպուհ Ս. Արք. Սարգսեանի եւ ձեռամբ Արժ. Տէր Յակոբ քհնյ. Քեշիշեանի մատուցւեց Սուրբ Եւ Անմահ Պատարագ:

Յընթացս Ս. Պատարագի Առաջնորդ Սրբազանը իր քարոզում սկզբին բացատրեց.- «Աստւածամօր Աստծուն ընծայւելու տօնը խորհրդանշում է մարդուն ինքնընծայումը Աստծոյ: Աստւածամայրը երեք տարեկանից մարդկութեան որպէս խորհրդանիշ ընծայւում է տաճարին, որպէսզի Աստծու օրհնութեամբ, շնորքով եւ առաջնորդութեամբ սկսի իր առաքելութիւնը»: «Այս տօնը որպէս խորհուրդ իր մէջ ունի նաեւ յատուկ իմաստ եւ նշանակութիւն: Քրիստոնէական հասկացողութեամբ Աստւածամայրը իր փոքր տարիքին իսկ խորհրդանշւեց, որպէս խոնարհութեան եւ համեստութեան խորհրդանիշ: Տաճար ընծայւեց որպէսզի Աստծոյ հովանու ներքեւ խոնարհաբար իր կեանքըն ապրի եւ գործի»:

Խոնարհութիւնը եւ համեստութիւնը առաքինութիւն է, որով իւրաքանչիւր անհատ, իր կեանքը արժեւորում է եւ իմաստաւորում:

Սրբազան Հայրը յաւելեց, որ «Այս տօնը մեզ բոլորիս մղում է խոնարհաբար մտածելու Աստւածամօր առաքելութեան մասին: Առաքելութիւն որով ինքը կամուրջ եղաւ երկնքի եւ երկրի, այսինքը մարդկութեան եւ Աստծոյ միջեւ: Ինքը եղաւ միջոց, փրկութեան տապան, լոյսի տաճար, որովհետեւ փոքր տարիքից նա լոյսն իր մէջ ունեցաւ, իր տաճար ընծայումով»:

Այսօր քրիստոնէական ողջ աշխարհը տօնում է այս տօնը եւ աղօթում է Աստւածամօր, որպէսզի այսօրւայ տագնապեցուցիչ այս աշխարհը մի պահ խաղաղեցնի: Այսօր աշխարհը որեւէ մէկ ժամանակից աւելի տագնապների եւ դժւարութիւնների մէջ է եւ մարտահրաւէրների առաջ է կանգնած նաեւ մեր ժողովուրդը: Այս օրերին մենք ապրում ենք մեր պատմութեան ամենադժւար եւ ճակատագրական ժամանակահատւածում: Հետեւաբար մենք որպէս հաւատացեալներ, այս կացութեան առաջ կանգնած պէտք է անդադար հանապազօրեայ աղօթքով խնդրել Աստծուց, որպէսզի ինքը մեզ խաղաղութեան առաջնորդէ եւ մեր հայրենիքին խաղաղութիւն շնորհէ, նաեւ մեր ժողովրդին զօրութիւն եւ քաջութիւն տայ, որպէսզի կարողանայ դիմանալ այս տագնապալի դժւարութիւններին:

Սրբազան Հայրն իր խօսքի մի այլ բաժնում մէջբերեց իմաստալից այս խօսքը՝ «Զօրութիւնը միութեան մէջ է» եւ յաւելեց, որ միասնականութիւնը առանցքն է մարդկային կեանքի, որով կը կարողանայ դիմագրաւել դժւարութիւններին: Հետեւաբար մենք բոլորս կոչւած ենք այս նւիրական տօնին աղօթելու, որ Աստւած մեզ բոլորիս ամրացնէ եւ զօրացնէ մեր կեանքի եւ դժւարութիւնների մէջ: Տոկունութեամբ վահանաւորէ մեզ, որպէսզի կարողանանք մեր կեանքը, որպէս հայ քրիստոնեայ շարունակել մեր աշխատանքով եւ մեր ներդրումը բերել մեր ժողովրդի զօրութեան մեր հայրենիքի եւ ինչուչէ նաեւ ողջ մարդկութեան համար:

Սրբազան Հայրն իր քարոզի մի այլ բաժնում ասաց.- «Ս. Աստւածածնի Երից ամաց ի տաճարն ընծայման տօնը, հռչակւած է նաև որպէս ուխտի և նւիրումի տօնակատարութիւն: Ուխտ, որով մենք հետևելու ենք Աստւածամօր կեանքի օրինակին, ուխտ, որով մենք նրան պիտի ուղղորդւենք և նաև ուղղորդենք մեր կեանքի մէջ, որպէս օրինակելի մայր»:

Սրբազան Հայրն իր քարոզն աւարտելով ասաց.- «Այս տօնը մեր իւրաքանչիւրի համար գեղեցկագոյն առիթ է, որ մենք մի պահ դիտենք Աստւածամօր պատկերը և փորձենք հաղորդւենք իր հաւատքով, յոյսով ու սիրով, իր նւիրումով, մայրական գորգուրանքով ու ժպիտով, որպէսզի կարողանանք մեր կեանքն ապրել Աստծու կամքի համաձայն»:

Արարողութեանը ներկայ էին Ի.Ի. խորհրդարանում Թեհրանի եւ հիւսիսային իրանահայութեա պատգամաւոր Արա Շահվերդեանը, Թեմական խորհրդի անդամ Հայկազ Շիրւանեանը, Քահանայից դասը, Եկեղեցական խորհուրդների ներկայացուցիչները եւ սակաւաթիւ թւով հաւատացեալներ։

Ազգային Առաջնորդարանի Հանրային Կապ

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ