Կիրակի, թւականիս հոկտեմբերի 23-ին, Թեմական Խորհրդի հրաւէրով, հանդիպում կայացաւ Հայաստանի Համահայկական խաղերի Համաշխարհային կոմիտէի Իրանի ներկայացուցիչ՝ պրն. Հենրիկ Խալոյեանի հետ:

Հանդիպման հիմնական օրակարգում էր Համահայկական 8-րդ ամառային խաղերը, որի բացման արարողութիւնը կը կայանայ Գիւմրիում իսկ խաղերը կանցկացւեն 2023 թւականի օգոստոսի 5-19-ը ընկած ժամանակահատւածում:

Պրն. Հենրիկ Խալոյեանը նշեց, որ Խաղերի պաշտօնական բացման ու փակման օրերի նաեւ կազմակերպչական աշխատանքների հետ կապւած մի շարք այլ որոշումներ կայացւել են թւականիս հոկտեմբերի 4-ին գումարւած՝ «Համահայկական խաղերի համաշխարհային կոմիտէ» ՀԿ գործադիր կոմիտէի նիստում, որտեղ նաեւ քննարկւել է Համահայկական խաղերի մարզաձեւերի ցանկն ընդլայնելու եւ Համահայկական խաղերի ընթացքում հաշմանդամային սպորտի մարզական խաղեր անցկացնելու հարցը, որոնք կը լինեն ցուցադրական բնոյթով։ Նիստի ընթացքում անդրադարձ է եղել նաեւ Համահայկական ձմեռային խաղերին եւ որոշւել է, որ 2025 թւականի փետրւարին անցկացնել Համահայկական ձմեռային 2-րդ խաղերը:

Պրն. Խալոյեանն իր արտայայտութիւնների ընթացքում մատնանշեց, որ Սպորտը երիտասարդներին կրթելու մաքրամաքուր ձեւ է, եւ այդ կերպ Համահայկական խաղերը միաւորում են հայութեանը եւ երիտասարդների մէջ միասնականութիւն ձեւաւորում: Նա յաւելեց, որ ֆինանսական բոլոր դժւարութիւններով հանդերձ, որպէս Սփիւռք, Իրանահայ համայնքն առանձնայատուկ ոգեւորութեամբ եւ ընդգրկուն կազմով է մասնակցում Համահայկական խաղերին:

Թեմական խորհրդի ատենապետ ճրտպ. Նորայր Արամեանն իր արտայայտութիւնների ընթացքում շնորհակալութիւն յայտնեց հնչած բացատրութիւնների կապակցութեամբ, ապա անդրադառնալով Համահայկական խաղերին մասնակից լինելու նախապատրաստական եւ կազմակերպչական աշխատանքներին յայտնեց, որ նախկին տարիների ընթացակարգի համաձայն, առաջին իսկ առիթով կեանքի կը կոչւի Համահայկական 8-րդ խաղերի Թեհրանի յանձնախումբը իսկ մինչ այն քայլեր կը ձեռնարկւի նիւթական խոչնդոտներին յաղթահարելու ուղղութեամբ, որն որպէս առաջին քայլ Իրանի Ազգային Օլիպիական Կոմիտէութեան կը ներկայացւի պետական նպաստ ստանալու կապակցութեամբ դիմումն ու ակնկալիքը:

Սոյն հանդիպման ընթացքում պրն. Հենրիկ Խալոյեանը, նաեւ որպէս Հ.Մ. «Արարատ» կազմակերպութեան Կենտրոնական վարչութեան ատենապետ հակիրճ զեկոյց ներկայացրեց Միութեան ընդհանուր գործունէութեան եւ յատկապէս մարզական եւ մշակութային ասպարէզներում միութեան մասնաճիւղերի վերջին ամիսների աշխատանքների եւ ապագայ ծրագրերի վերաբերեալ:

Հանդիպման աւարտին պրն. Նորայր Արամեանը գնահատեց Միութեան գործունէութիւնը եւ յաջողութիւն մաղթեց ապագայ աշխատանքներին:

Ազգային Առաջնորդարանի Հանրային կապ