Մօտալուտ նոր տարւայ եւ Ս. Ծննդեան ու Աստւածայայտնութեան օրհնաբեր տօների առիթով ջերմօրէն ողջունում եմ մեր հաւատացեալ ժողովրդի զաւակները, բոլորին մաղթելով խաղաղ, առողջ եւ բեղուն գործունէութեամբ յատկանշւած կեանք:

Մարդու կեանքը միշտ արժեւորւում եւ իմաստաւորւում է նորոգութեամբ. նրա համար սաղմոսերգու մարգարէն ասում է.-«Մաքուր սիրտ հաստատիր իմ մէջ Աստւած եւ արդար հոգի նորոգիր իմ որովայնում» (Սղ. 51:10)

Դժբախտաբար այսօր մարդկութիւնը սխալ է մեկնաբանում նորոգութիւնն ու վերանորոգումը եւ անոր համար իր կեանքը վերածում է տագնապալի ապրումների մի անքակտելի օղակի: Հարկ է Աստւածաշունչ Մատեանի խօսքերը ճշգրիտ կերպով հասկանալ եւ ըստ այնմ ապրել, որովհետեւ ճշմարիտ իմացումով է, որ մենք պիտի կարողանանք նաեւ աստւածային ճշմարտութեան թարգմանը լինել կեանքի մէջ: Էականը ճշմարիտ կերպով կեանքին մօտենալ եւ ըստ այնմ շարժւելն է:

Հարկ է նոր տարւայ եւ Ս. Ծննդեան այս օրերին ժամանակ գտնել մտածելու, խորհրդածելու եւ վերանորոգւած կերպով շարունակելու մեր կեանքը: Այս խոհերով շնորհաւորում եմ ձեզ եւ ի սրտէ մաղթում, որ աստւածային օրհնութեամբ շողարձակի ձեր կեանքը, որպէսզի օրինակ լինէք մեր նոր սերնդի եւ երիտասարդութեան կեանքին: Իմանանք որ երիտասարդութիւնը պէտք ունի կեանքի օրինակներին եւ ոչ անպայման քննադատութեան: Թող այս նոր տարին մեզ համար լինի սիրոյ եւ խաղաղութեան, այլեւ միութեան եւ միասնականութեան տարի:

Այս առիթով, սրտագին շնորհակալութիւնս եմ յայտնում Պատգամաւորական Ժողովին, Թեմական, Կրօնական եւ ազգային խորհուրդներին, այլեւ թեմակալ առաջնորդներին, ազգայիններին եւ միութիւններին, որոնք բարեմաղթութիւններ կատարեցին առողջութեանս համար: Աստւած օրհնի բոլորին:

Բոլորիդ ասում եմ շնորհաւոր նոր տարի եւ Ս. Ծնունդ եւ վերջապէս սիրելիներ յիշենք Պօղոս առաքեալի Գաղատացիներին գրած հետեւեալ խօսքերը.-«Հետեւաբար քանի դեռ ժամանակը մեր ձեռքն է բարիք անենք բոլորին մանաւանդ հաւատի ճանապարհի մեր հարազատներին» (Գղ. 6:10)

Շնորհաւոր Նոր տարի եւ Ս. Ծնունդ.
Ամէն:

ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ