Սեպուհ Սրբազան. «Կը գայ այն օրը, երբ մենք կրկին պէտք է տեսնենք Արցախի դրօշը Արցախում ծածանւած»
Հայաստանի Հանրապետութեան վերանկախացման 32-րդ ամեակի առիթով, կիրակի 24 սեպտեմբեր 2023 թւականի առաւօտեան թեմիս բոլոր եկեղեցիներում տեղի ունեցաւ Հանրապետական մաղթանք: Ս. Սարգիս եկեղեցում կրօնական արարողութեան նախագահում էր թեմիս Առաջնորդ Գերշ. Տ. Սեպուհ Ս. Արք. Սարգսեանը:
Ս. պատարագի ընթացքում Սրբազան Հօր ձեռամբ օրհնւեց Եռագոյն դրօշը, որից յետոյ հնչեց «Մեր Հայրենիք» օրհներգը: Սրբազան Հայրը իր քարոզում անդրադառնալով օրւայ խորհրդին ասաց.-«Հանրապետական մաղթանքը հանրապետութեան խաղաղութեան, բարօրութեան, բարգաւաճման եւ զօրութեան համար է եւ մենք այդ յոյսով եւ հաւատքով աղօթում ենք մեր հայրենիքի անսասանութեան համար»։ Նա ընդգծեց, որ դժբախտաբար, այս տարի Հայաստանի Հանրապետութեան Անկախութեան տօնը պատւած է տխրութեամբ, մեր ժողովրդի աչքերում արցունք կայ, սրտերում ցաւ եւ վիշտ, որովհետեւ մեր պատմական հայրենիքին անքակտելիօրէն մաս կազմած եւ կազմող Արցախն այսօր վիրաւոր է եւ թշնամու ճիրանների ներքոյ, բայց մեր պատմութիւնը նման դէպքեր շատ է տեսել, թէեւ մեր ժողովուրդը անգամներ մահւան ճիրանների մէջից է անցել, բայց հաւատացած է, որ ինքը ծնւած չէ մեռնելու համար, ինքը ծնւած է ապրելու, ստեղծագործելու եւ գոյատեւելու համար: Սրբազան Հայրը ընդգծեց. «Ես հաւատացած եմ, որ կը գայ այն օրը, երբ մենք կրկին պէտք է տեսնենք Արցախի դրօշը Արցախում ծածանւած»: Սրբազան Հայրը պատմութեան իմացութիւնը կարեւորելով ասաց որ այն բոլոր ժողովուրդները, որ հաւատարիմ են իրենց պատմական հայրենիքին ու ազգային արժէքներին, սրբութիւններին ու աւանդութիւններին, այդ ժողովուրդը կառչած կմնան իրենց էութեան։
Օրւայ արարողութեանը ներկայ էին՝ Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թ.Հ.Թ. Պատգամաւորական ժողովի ատենապետ դոկտ. Սեւակ Հաթամեանը, Թ.Հ.Թ. Թեմական խորհըրդի ատենապետ ճրտ. Նորայր Արամեանը, հիւրաբար Թեհրանում գտնւող Ղպտի եկեղեցու հոգեւորականներից, եւ հայրենակիցներ:
Ազգային Առաջնորդարանի Հանրային կապ
http://tehranprelacy.com/9-content-hy/news-hy/4244-2023092602?tmpl=component&print=1#sigProId629d4ee49d