Այսօրւայ փոփոխւող աշխարհում, որտեղ անհատապաշտութեան եւ բարոյական յարաբերականութեան ալիքները սպառնում են ընտանիքներին ու բարոյական արժէքներին, աշխարհի կրօնական բոլոր հաստատութիւնները, յատկապէս Իրանում, իրենց վրայ ընդունելով երկնային ու բարոյական արժէքների պաշտպանութիւնը, կազմակերպում են ուսուցողական եւ ջադագովական համագումարներ ու ձեռնարկներ։
Յիշեալ համագումարներից է Քոյրերի ճեմարանների կառավարման կենտրոնին կից Կանանց եւ ընտանիքի գիտահետազօտական ինստիտուտի կողմից կազմակերպւած միջազգային գիտաժողովը՝ նւիրւած ընտանիքին եւ նրա բարոյական արժէքներին, որը շուտով տեղի է ունենալու Թեհրանում եւ Ղումում, տեղական եւ արտասահմանեան մտաւորականների մասնակցութեամբ:
Այս գիտաժողովին նաեւ հրաւիրւած է Թեմիս Առաջնորդ Գերշ․ Տ․ Սեպուհ Ս․ Արք․ Սարգսեանը: Այս առիթով շաբաթ՝ 1 յուլիս 2023 թւականի առաւօտեան, Առաջնորդ Սրբազան Հայրը իր գրասենեակում ընդունեց համագումարի գիտական եւ գործադիր մասնագէտներ դոկտ. Հոջաթօլիսլամ Մաջիդ Դեհղանին, դոկտ․ Էբադիին եւ դոկտ. Զահրա Շարիֆին։
Հանդիպման ընթացքին Առաջնորդ Սրբազան Հօրը հանրութեան ծանօթացնելու նպատակով տեղի ունեցաւ հարցազրոյց «Ընտանիք» թեմայով, որտեղ քննարկւեցին վերջին տասնամեակներին ընտանիքներում տեղի ունեցած փոփոխութիւնները, անհատապաշտութեան եւ բարոյական ազատականութեան գաղափարը։ Նաեւ խօսւեց ընտանեկան ու բարոյական արժէքների պահպանման գործում եկեղեցու եւ հոգեւորականութեան դերակատարութեան մասին։
Ազգային Առաջնորդարանի Հանրային կապ