Կիրակի, 2 յուլիս 2023 թւականին, յընթացս Ս. եւ անմահ պատարագի Թեհրանի բոլոր եկեղեցիներում կատարւեց Հայրապետական մաղթանք Ս. Աթոռիս գահակալ՝ Ն.Ս.Օ.Տ.Տ. Արամ Ա. Կաթողիկոսի ընտրութեան եւ օծման քսանութերորդ տարեդարձի առիթով:
Ս. Սարգիս եկեղեցում կրօնական արարողութեան նախագահեց եւ այս առիթով իր պատգամը փոխանցեց թեմիս առաջնորդ՝ Գերշ. Տ. Սեպուհ Ս. Արք. Սարգսեանը:
Պատարագիչն էր Արժ․ Տ․ Արիստակէս Քահանայ Շահմիրեանը։
Արարողութեանը ներկայ էր Թեմական խորհրդի ատենապետ Նորայր Արամեանը եւ հաւատացեալ ժողովուրդ։
Առաջնորդ Սրբազան Հայրն իր քարոզի ընթացքին, օրւայ խորհրդին անդրադառնալով յայտնեց.-«Հայրապետի եւ Սուրբ Աթոռի ու եկեղեցու առաջնորդների համար առ Աստւած աղօթք բարձրացնելը նշանակում է հոգեպէս եւ ֆիզիկապէս սատարել եւ մենք Սուրբ Աթոռների աթոռակալների զաւակների՝ Պօղոս եւ Պետրոս առաքեալների թելադրանքով՝ աղօթք ենք բարձրացնում նրանց արեւշատութեան համար»։ Նա իր խօսքը շարունակելով ասաց․-«Մեր եկեղեցին իր բնոյթով, նկարագրով եւ ուսուցումներով միշտ հայ ժողովրդի կեանքի անբաժան մասնիկն է եղել»։ Սրբազան Հայրը նաեւ մատնանշեց հայ ազգի մտքի ու հոգու մեծագոյն լուսաւորիչներ Սուրբ Մեսրոպ Մաշտոցին եւ Սուրբ Սահակ Պարթեւին, որոնք իրենց հաւատքով ու ջանասիրութեամբ մեր եկեղեցին պայծառակերպեցին եւ այդպիսով նրանք եղան ջահակիր լուսաւորիչներ, որոնք մեր ժողովրդի կեանքը լուսաւորեցին աստւածային լուսով։
Սրբազան Հայրը իր խօսքի միւս բաժնում յիշելով եկեղեցուն սատարող աշխարահականաց դասը, ակնարկեց Քրիտոնէութիւնը Հայաստանում տարածման գործում, Սուրբ Գրիգոր Լուսաւորչին օժանդակող Ս․ Տրդատ Գ Արքային, Աշխէն թագուհուն եւ Արքայադուստր Խոսրովիդուխտին, որոնք եկեղեցու եւ ժողովրդի կեանքում եղան հաւատքի ախոյեաններ եւ քրիստոնէական վարդապետութեան պաշտպաններ։
Սրբազան Հայրն իր խօսքը շարունակելով ասաց, որ մեր եկեղեցու կեանքը միախառնւած է մեր ժողովրդի կեանքին, հանդիսանալով որպէս լուսատու ջահ աշխարհի խաւարում։ Նա ապա ընդգծելով ազգի պատմութեան իմացութեան կարեւորութիւնը, յիշեց հայոց մեծ բանաստեղծ Յովհաննէս Թումանեանի խօսքը, որ ասում է․-«Մեր ժողովրդի պատմութիւնը լուսատու ջահ է», որը լուսաւորում է մեր ճանապարհը եւ այդ լուսաւորութիւնը մեզ կապում է մեր անցեալին եւ ինչու չէ նաեւ մեր ապագային։
Առաջնորդ Սրբազան Հայրը եզրակացնելով իր պատգամը ասաց․-«Հայրապետական մաղթանք կատարելով մի անգամ եւս փառաբանում ենք մեր Տիրոջ Յիսուս Քրիստոսին, հայցելով Նրա հովանաւորութիւնը եւ իր առաջնորդութիւնը»։ Ապա Նա հայցեց առ բարձրեալ Աստւած արեւշատութիւն, առողջութիւն պարգեւի Ազգիս երկու Հայրապետներին։ Նաեւ հայցեց որ Տէրը անսասանութիւն եւ պահպանութիւն պարգեւի մեր հայրենիքին, մեր եկեղեցուն եւ բանակին։
Ազգային Առաջնորդարանի Հանրային կապ
http://tehranprelacy.com/news-am/9-content-hy/news-hy/4160-2023070201?tmpl=component&print=1#sigProIdfa0e79704d