Երեքշաբթի 25 յուլիս 2023 թւականին, «Ղօղանջ զարթօնքի» արշաւի միջոցառման մեկնարկից առաջ, Թեմիս Առաջնորդ գերշ, Տ. Սեպուհ Ս. Արք. Սարգսեանը հեռախօսազրոյց է ունեցել Արցախի Հանրապետութեան երրորդ նախագահ Բակօ Սահակեանի հետ:
Հեռախօսազրոյցի ընթացքում, Սրբազան Հայրն իրանահայութեան ողջոյններն ու զօրակցութիւնն է փոխանցել Արցախին եւ արցախահայութեանը՝ նշելով, որ օրհասական այս օրերին Արցախի մեր քոյրերն ու եղբայրները իւրաքանչիւր իրանահայի աղօթքների, մտածումների եւ խոհերի մէջ են:
Բակօ Սահակեանն իր եւ արցախահայութեան անունից երախտագիտութիւն է յայտնել Սրբազան Հօրն ու իրանահայութեանը՝ զօրակցական միջոցառման եւ խօսքերի համար, եւ խնդրել է իր եւ արցախահայութեան անունից ողջոյնի խօսքեր փոխանցել իրանահայութեանը:
Ազգային Առաջնորդարանի Հանրային կապ