ԱՆԼԱՅՆ ՎՃԱՐՈՒՄ

Ծխական Տուրք

Մեր փոքր , բայց կարեւոր ներդրում է Ազգային-Համայնքային կառոյցների Պահպանման համար

Սիրելի ժողովուրդ, Թեհրանի հայոց Թեմական Խորհրդի որոշմամբ՝ Ծխական Տուրքի վճարումը Ձեզ համար դիւրացնելու նպատակով՝ այսուհետ կարող էք կատարել այս կայքի միջոցով, որով օգտակար կը հանդիսանաք թեմիս ազգային-համայնքային կառոյցների պահպանման գործին:

ԾԽԱԿԱՆ ՏՈՒՐՔԻ ԱՆԼԱՅՆ ՎՃԱՐՈՒՄ

Մասնակից Աշակերտների Տպաւորութիւնները Շուշիի ասմունքի Համահայկական 7-րդ փառատօնից

2018 թւի յուլիսի 31-ից մինչեւ օգոստոսի 2-ը, Շուշիում տեղի ունեցաւ ասմունքի Համահայկական 7-րդ փառատօնը, նւիրւած «Արցախեան շարժման» 30-ամեակին:

Թեհրանի Հայոց Թեմի հայկական դպրոցներից 16 աշակերտներ, իրենց մասնակցութիւնը ունեցան սոյն փառատօնին:

Ստորև ներկայացնում ենք սոյն աշակերտ-ուհիների տպաւորութիւնները, որ ունեցել են այս հրաշալի փառատօնից:

Մարտին Աղանեան՝
Այս տարի Արցախի շարժման 30 -ամեակն է: Ես յաջողեցի մասնակցել Շուշիի ասմունքի փառատօնին: Ես շատ լաւ ընկերներ գտայ եւ նրանց հետ անմոռանալի պահեր անցկացրեցի եւ միասին վայելեցինք, այցելեցինք Արցախի մի քանի տեսարժան վայրեր: Այս տարի առաջին անգամ էր, որ ես մասնակցում էի փառատօնին:

Թենի Աղաբաբայեան՝
Այս տարի Շուշիի ասմունքի փառատօնին վայելեցինք հաճելի պահեր, այցելելով Ստեփանակերտի տարբեր տեսարժան վայրեր: Այցելեցինք նաեւ Սուրբ Ամենափրկիչ Ղազանչեցոց եկեղեցին, որտեղ օրհնւեցինք եւ լցւեցինք Սուրբ Հոգով …

Անի Յովհաննիսեան՝
«Հողի ուժը» այն բառակապակցութիւնն է, որ ես շատ էի լսում մեր տանը, բայց չէի հասկանում ինչ է նշանակում այն:
Եւ ահա հասաւ իմ երազանքների օրը, երբ ես ընկերներիս հետ մեկնեցի Շուշի՝ Արցախ: Այնտեղ էր, որ զգացի հայրենի հողի մագնիսական՝ կախարդական ուժը: Այն հողի, որտեղ հոսել է իր քաջ զաւակների եւ մարտիկների արիւնը …
Եւ ահա, թէ ո՞րն էր «Հողի ուժը»:

Ամարաս Լազարի՝
Հաճելի էր երկրորդ անգամւայ համար Ղարաբաղում գտնւելը, ասմունքի փառատօնին մասնակցելը եւ նոր յուշեր ու ընկերներ ձեռք բերելը: Յոյսով հնարաւորութիւն կը լինի նորից գնալ եւ մասնակցել այդ մրցոյթին՝ անցկացնել կեանքի ամենալաւ օրերը:

Լիա Դարուսի՝
Իւրաքանչիւր մասնակից իւրովի է ընկալում մասնակցութիւնը այս փառատօնին, բայց առաջնահերթութիւնը մեր ներկայութիւնն էր, որպէս սփիւռքահայ, իբրեւ պատգամաւոր: Պարզօրէն անցկացրել ենք հիանալի օրեր մեր իրական տան մէջ: Եւ դա է, որ անմոռանալի է դարձնում Շուշիի ասմունքի 7-րդ փառատօնը …

Նոյ Նազարեան՝
Ասմունքելը միշտ ինձ հաճոյք է պատճառել ու եղել է իմ նախասիրութիւններից մէկը: Բայց Արցախ աշխարհում ասմունքելը առաւել ուժ եւ աւիւն է բաշխում հոգուս ու մարմնիս …
Կարծէք թէ Շուշւայ բերդաքաղաքի արծիւները սլացքի թեւեր են տալիս ինձ ու թւում է թէ ճախրում եմ պապենական հայրենիքիս ջինջ երկնքում…

Ալին Քեշիշեան՝
Շուշիի ասմունքի 7-րդ փառատօնի առթիւ, որպէս մասնակից առաջին անգամն էր, որ ճամբորդում էի Ղարաբաղ: Հիանալի էր այնտեղ լինելը, կազմակերպւածութիւնը, միացութիւնը եւ մթնոլորտը: Նոր մարդկանց հետ ծանօթանալը եւ նրանց հետ ընկերանալը պատճառ դարձաւ որպէսզի յաւերժանան այս տարւայ փառատօնի յուշերը:

Ամարաս Նազարեան՝
Թէկուզ կարճ, բայց վայելեցինք մեր պատմական արծւաբոյն աշխարհի հիասքանչ բնութիւնը:
Ճիշտ է, որ մենք հաւաքւել էինք երկրագնդի տարբեր մայրցամաքներից, բայց բոլորիս սրտի խորքում կար մի հոգեհարազատ անուն՝ Արցախ աշխարհ:

Զեփիւռ Նազարեան՝
Մենք աշխարհի տարբեր երկրների սփիւռքահայերս հաւաքւելով Արցախ աշխարհի սրտում՝ Շուշիում, մեզ զգացինք մի հսկայ ազգ: Շուշիի ասմունքի փառատօնը հիանալի առիթ էր մեզ համար մասնակցելու ու նաեւ ծանօթանալու եւ վայելելու Շուշիի հրաշք բնութիւնը, զարմանալ նրա եզակի վանքերի ու ճարտարապետութեան հմայքից:
Այս ամենի համար շնորհակալ ենք նեղութիւն կրողներին՝ փառատօնի կազմակերպիչներին:

Սելիա Սարգսեան՝
Այս տարի եւս բախտ ունեցայ մասնակցելու ասմունքի Համահայկական փառատօնին:
Այս տարի կրկին հանդիպեցի այն մարդկանց, որոնց հետ ծանօթացել էի տարիներ առաջ, հաճելի էր: Տեսայ թէ նրանք ինչպէ՜ս են գովաբանում իրանահայերի վարւելակերպը, բարեհամբոյր մօտեցումը եւ ամենակարեւորը հայրենասիրութիւնը:
Ուրախութեամբ կարող եմ խոստովանել, որ ամէն անգամ հայրենի հողում գտնւելիս նոր զգացմունքներ եմ ապրում: Այդ իսկ պատճառով իմ խորին շնորհակալութիւնն եմ յայտնում Թեհրանի հայոց թեմի Կրթական խորհրդին, Մշակութային փառատօնի յանձնախմբի յարգելի պատասխանատուներին եւ սիրելի ուսուցչուհիներին, որ կրկին մեզ առիթ տւեցին բարձրանալ այդ հոյակապ բեմը: Գտնել նոր ընկերներ եւ շնչել մեր հայրենի երկրի օդը:

Գեղանի Դարաբիդեան՝
Փառատօնը գեղեցիկ բնոյթ ունի, ոչ միայն մրցակցութեան, այլ նաեւ համախմբելով տարբեր երկրների հայ աշակերտներին, առիթ է հանդիսանում նոր ծանօթութիւնների եւ ինչպէս նաեւ ցոյց է տալիս նրանց հայրենասիրութիւնը, ոգեւորութիւնը, սէրը, յարգանքը եւ նւիրւածութիւնը դէպի հայրենիք:
Ողջունում եմ կազմակերպիչներին, մասնակիցներին ու շնորհակալութիւն եմ յայտնում նրանց, այս գեղեցիկ առիթը ընձեռելու համար:

Անայիս Աբնուսեան՝
Սրտանց պիտի ուրախութիւնս արտայայտեմ, որ մէկ անգամ եւս առիթ ունեցայ մասնակցելու Շուշիի ասմունքի փառատօնին:
Որքան անգամ էլ գնաս Արցախ՝ Շուշի, նոյնքան նորութիւնների կը հանդիպես:
Ասմունքի փառատօնի բոլոր մասնակիցները ոգեւորւած էին:

ԼԵԶՒԻ ԸՆՏՐՈՒԹԻՒՆ

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com