Նախաձեռնութեամբ Քրիստոնէական Դաստիարակութեան Բաժանմունքի եւ համագորածակցութեան հեռանկարով, ուրբաթ 11 մարտ 2016-ի կէսօրին մի հանդիպում կայացաւ Հայ Համալսարանականների Ընդհանուր Միութեան վարչութեան եւ Կրօնական Խորհրդի Քրիստոնէական Դաստիարակութեան եւ Երիտասարդաց Յանձնախմբերի ներկայացուցիչների միջեւ ազգային առաջնորդարանի դահլիճում։

Քրիստոնէական Դաստիարակութեան բաժանմունքի պատասխանատու տկն. Շաքէ Եղիայեանը ժողովականներին բացատրեց սոյն հանդիպման հիմնական նպատակը, որ է աւելի սերտ համագործակցութեամբ աշխուժացնել միութեան եւ յանձնախմբերի գործունէութիւնը։ Ժողովականները անկեղծ եւ սրտաբաց զրոյցով ու կարծիքների փոխանակելով կազմեցին մի ծրագիր յառաջիկայ ամիսների վրայ տարածւած, որով հնարաւորութիւն է ստեղծւելու հասնելու մեր երիտասարդութեան եւ ինչու չէ նաեւ ժողովրդին։ 

Կարծիքների փոխանակումից յետոյ ժողովականներին հանդիպեց թեմիս առաջնորդ Գերշ. Տ. Սեպուհ Ս. Արք. Սարգսեանը, որ իր ուրախութիւնն ու գոհունակութիւնը յայտնեց այս կարեւոր հանդիպման առիթով շեշտելով, որ այսօրւայ մեր գաղութի կեանքի պայմանները մեզ մղում են նման համագործակցութեան եւ համատեղ աշխատանքի. « Մեր թեմում նոյեմբերի վերջին ուրբաթ օրը յայտարարւել է որպէս Երիտասարդութեան օր. ասաց Սրբազան հայրը, սա առիթ պիտի լինի որ մենք լրջօրէն պատրաստւենք Երիտասարդութեան օրը արժեւորելու » եզրակացրեց Սրբազան հայրը։ 

Աւելի քան երկու ժամ տեւող այս հանդիպումը եզրափակւեց մասնակիցների կողմից մի մարմնի կազմութեամբ, որի պարտականութիւնը լինելու է առնւած որոշումներն ու ծրագիրները կեանքի կոչել։