Երեքշաբթի,18 յուլիս 2023 թւականին, Թեմիս Առաջնորդ Գերշ. Տ. Սեպուհ Ս. Արք. Սարգսեանը, ընկերակցութեամբ Թեմական խորհրդի ատենապետ ճրտպ. Նորայր Արամեանի, փոխատենապետ Վահէ Թարոյեանի, Հանրային կապի հոգեւոր խորհրդատու Արժ․ Տ․ Գրիգորիս Քհնյ. Ներսէսեանսի եւ Ազգ. Առաջնորդարանի դիւանապետ Զօրիկ Կարապետեանի, Իր մասնակցութիւնը բերեց դոկտ. Յովիկ Բեհբուի հեղինակած «Մահմեդականը եւ այլադաւանների ժառանգութիւնը» գրքի քննարկմանը նւիրւած նիստին:

Միջոցառմանը նաեւ ներկայ էին փիլիսոփայ եւ իրաւաբան, Իրանի Գիտութիւնների ակադեմիայի իսլամագիտութեան բաժնի մշտական անդամ եւ ղեկավար այաթ. Մոհաղեղ Դամադը, Գրքի հեղինակի իրաւաբանութեան դասախօս հոջաթօլիսլամ Գոլին․ Իսլ. խորհրդարանում իրանահայ պատգամաւորներ՝ Արա Շահվերդեանը եւ Ռոբերտ Բեգլարեանը, Հայ կաթողիկէ համայնքի առաջնորդ Տ. Սարգիս եպս. Դաւիթեանը, ինչպէս նաեւ իրանահայ եւ պարսկալեզու իրաւագէտներ եւ ոլորտի դասախօսներ:
Հանդիպումը վարում էր հրատարակչութեան տնօրէն Արտոյտ Զոհրաբեանը:

Ընթացքում հպանցիկ կերպով քննարկւեց գրքի կարեւոր գլուխների՝ ա- Մուսուլմանի դիմաց անհաւատի ՀՈՋԲ-ը (ժառանգութիւնից զրկւելը) իսլամական իրաւագիտութեան տեսանկիւնից, բ- Իրանի օրէնսդրութեամբ ամրագրւած կրօնական փոքրամասնութիւնների ժառանգութեան հարցում մահմեդականների իրաւունքների բացառում, խնդիրները, որը Մոհաղեղ Դամադի առաջարկով անհրաժեշտ է վերածել գիտական յօդւածների, ինչը առիթ կը տայ գիրքը ներկայացնել նաեւ Ղոմի Կրօնագիտական համալսարանի գիտական քննարկումների համար:

Առաջնորդ Սրբազան Հայրը նաեւ եզրափակիչ խօսքով հանդէս գալով կարեւորեց իսլամ․քրիստոնեայ եւ հրեայ համայնքների միասնականութւնը որպէս Իրանի միսանականութեան ազդակ ու ասաց սա կը գոյանայ այն ժամանակ, երբ Իրանի հասարակութեան բոլոր անդամները հետեւելով իրենց նախնիներին փոխադարձ սիրով, յարգանքով եւ անձնազոհութեամբ՝ Լիբանանցի քրիստոնեայ բանաստեղծ Խալիլ Ջբրան Խալիլի խօսքերով իրար հանդէպ սէր տածելով կենարար հաց դառնան։

Յաւելենք, որ նիստին ներկայ էր նաեւ Իսլ. առաջնորդութեան եւ մշակոյթի նախարարութեանը կից ազգային եւ կրօնական փոքրամասնութիւնների գրասենեակի ներկայացուցիչը:

Ազգային Առաջնորդարանի Հանրային կապ